“Mashinada qolsak, o‘lishimiz aniq edi”. Yangi yil arafasida Qamchiqda yuzlab odamlarning hayoti saqlab qolindi

Qamchiq dovonida kuchli qor yog‘ishi, buning oqibatida yo‘lning vaqtincha yopilishi avval ham ko‘p bora kuzatilgan. Biroq 26-dekabr kungi holat ijtimoiy tarmoqlar va messenjerlarda ayniqsa ko‘p yoritildi, vaziyat yuzasidan har doimgidan ham ko‘proq axborot berilib, u faol muhokama qilindi.

Ijtimoiy tarmoqlar va messenjerlarda qoldirilgan xabarlarga ko‘ra, kuchli shamol bilan birga kuzatilgan qor bo‘roni oqibatida dovon yo‘li sanoqli soatlar ichida qalin qor bilan qoplangan, o‘nlab avtomobillar qor ostida qolib ketgan, odamlar o‘z avtomobillaridan eson-omon chiqib olish uchun qutqaruvchilarning yordamidan foydalanishga majbur bo‘lgan. Bu gap-so‘zlarni Favqulodda vaziyatlar vazirligi 27-dekabr kuni to‘liq tasdiqladi.

Rasmiy axborotga ko‘ra, 70 dan ziyod fuqaro doimiy faoliyat ko‘rsatuvchi postlarga, 1800 ga yaqin kishi 45 ta umumiy ovqatlanish maskanlariga joylashtirilgan (ulardan 29 nafari bolalar edi), issiq choy va ovqat bilan ta’minlangan. Kamida 25 nafar haydovchi va yo‘lovchiga tibbiy va psixologik yordam ko‘rsatilgan. Bundan tashqari, 44 ta avtotransport vositasi qor uyumidan chiqarib olingan, ulardan 6 tasi evakuator bilan ustaxonaga yetkazilgan.

Vazirlik keltirgan bu raqamlar bir qarashda oddiy statistikadek ko‘rinadi, biroq bevosita hodisa ichida bo‘lib, kuchli xavotirda qolgan vatandoshlarning guvohliklari voqeaga jon bag‘ishlaydi, bu shunchaki hisobot raqamlar emas, balki yuzlab odamlar hayoti bilan bog‘liq keng ko‘lamli qutqaruv operatsiyasi bo‘lganini anglatadi.

Bunaqasini tug‘ilganimdan beri ko‘rmaganman. Faraz qiling — 23:15 da buloqdan 200 metr pastda qolib ketdik. Oldimizda tirbandlik. Ikki soat o‘sha yerda turdik — kuchli shamol bo‘lib, mashinani tomigacha qor qopladi. Eshikdan tushishning hech iloji yo‘q, “Ey, Xudo, o‘zing asra”, deb ovoz chiqarib so‘radik.

Bir vaqt Favqulodda vaziyatlar vazirligining yigitlari kelib: “Aka, anavi yerda issiq joy bor, ammo 300 metrcha yurish kerak. Nima bo‘lsa ham o‘zimdan, ertaga shikoyat qilmayman, desangiz, ertalab olib ketamiz”, — deyishdi. Ammo nafas olib bo‘lmayotgandi, o‘pka kasallanishi mumkinligini aytishdi. Mashina yurmaydi, qolsak, o‘lishimiz aniq. Tavakkal — o‘sha yerga yetib bormasak bo‘lmaydi.

Yo‘lda Mamajon aka lop etib yo‘qolib qoldi. “Hoy Abdulaziz, meni tashlab ketmanglar, olib ketinglar”, deb baqirardilar. Bo‘y barobar qor tagiga kirib ketibdi. Yurmang degan joyidan yurib, haligi joyda qor ostiga kirib ketibdi. Qordan chiqarib oldik. Ichkariga, issiqqa kirganimizdan keyin nafas yo‘lini davolash uchun to‘rt tomchidan dori ichirishdi. Haqiqatan ham nafas olib bo‘lmayotgandi, bir metr nari ko‘rinmayotgan edi.

Eni 2 metrlik issiq xonaga joylashtirishdi. Bizdan tashqari yana bir necha o‘n kishi bor edi. Oramizda bir kelinchak ham bor edi — bolasining yuzlari ko‘karib ketgan. Qutqaruvchilar orasida yaxshi shifokori bor ekan, darrov ukolini qildi. Kelinchak: “Qilmang!”, deganiga qaramay, shifokor: “Qoch! Bolang 2 soatda yo o‘ladi, yo qoladi”, deb baribir ukol qildi. Bolaning ko‘karishi tarqab, onasini emishni boshladi.

Soat tong 5:00 larda FVVning yigitlari bir o‘rta yoshli ayolni ikki kilometr masofadan yelkada ko‘tarib kelishdi. Yigitlar haqiqiy halol ishladi...

Uxlab qolibmiz. Soat 9:00 da tursak, havo ochilib, shamollar to‘xtagan ekan. Tashqarida -17 daraja sovuq ekanini aytishdi. “O‘tirib turing, yo‘l ochilsa, o‘zimiz aytamiz. Soat 11:00 larda ochilishi mumkin, ammo aniqmas”, deb aytishdi. “Mashinamizning oldiga borib turamiz”, desak, ruxsat berishdi.

27-dekabrga o‘tar kechasi Qamchiq dovonida qolib ketgan fuqaro hikoyasi

Ma’lumotlarga ko‘ra, ob-havonining keskin o‘zgarishi, qor yog‘ishi, bo‘ron bo‘lishi va yo‘lning muzlashi to‘g‘risida “O‘zgidromet”dan oldindan ma’lumot olinib, ijtimoiy tarmoqlar va dovondagi tablolar orqali axborot berilmoqda, shuningdek, Qamchiqdagi avtoturargohlarda tushuntirish ishlari olib borilmoqda.