«Машинада қолсак, ўлишимиз аниқ эди». Янги йил арафасида Қамчиқда юзлаб одамларнинг ҳаёти сақлаб қолинди

Қамчиқ довонида кучли қор ёғиши, бунинг оқибатида йўлнинг вақтинча ёпилиши аввал ҳам кўп бора кузатилган. Бироқ 26 декабрь кунги ҳолат ижтимоий тармоқлар ва мессенжерларда айниқса кўп ёритилди, вазият юзасидан ҳар доимгидан ҳам кўпроқ ахборот берилиб, у фаол муҳокама қилинди.

Ижтимоий тармоқлар ва мессенжерларда қолдирилган хабарларга кўра, кучли шамол билан бирга кузатилган қор бўрони оқибатида довон йўли саноқли соатлар ичида қалин қор билан қопланган, ўнлаб автомобиллар қор остида қолиб кетган, одамлар ўз автомобилларидан эсон-омон чиқиб олиш учун қутқарувчиларнинг ёрдамидан фойдаланишга мажбур бўлган. Бу гап-сўзларни Фавқулодда вазиятлар вазирлиги 27 декабрь куни тўлиқ тасдиқлади.

Расмий ахборотга кўра, 70 дан зиёд фуқаро доимий фаолият кўрсатувчи постларга, 1800 га яқин киши 45 та умумий овқатланиш масканларига жойлаштирилган (улардан 29 нафари болалар эди), иссиқ чой ва овқат билан таъминланган. Камида 25 нафар ҳайдовчи ва йўловчига тиббий ва психологик ёрдам кўрсатилган. Бундан ташқари, 44 та автотранспорт воситаси қор уюмидан чиқариб олинган, улардан 6 таси эвакуатор билан устахонага етказилган.

Вазирлик келтирган бу рақамлар бир қарашда оддий статистикадек кўринади, бироқ бевосита ҳодиса ичида бўлиб, кучли хавотирда қолган ватандошларнинг гувоҳликлари воқеага жон бағишлайди, бу шунчаки ҳисобот рақамлар эмас, балки юзлаб одамлар ҳаёти билан боғлиқ кенг кўламли қутқарув операцияси бўлганини англатади.

Бунақасини туғилганимдан бери кўрмаганман. Фараз қилинг — 23:15 да булоқдан 200 метр пастда қолиб кетдик. Олдимизда тирбандлик. Икки соат ўша ерда турдик — кучли шамол бўлиб, машинани томигача қор қоплади. Эшикдан тушишнинг ҳеч иложи йўқ, «Эй, Худо, ўзинг асра», деб овоз чиқариб сўрадик.

Бир вақт Фавқулодда вазиятлар вазирлигининг йигитлари келиб: «Ака, анави ерда иссиқ жой бор, аммо 300 метрча юриш керак. Нима бўлса ҳам ўзимдан, эртага шикоят қилмайман, десангиз, эрталаб олиб кетамиз», — дейишди. Аммо нафас олиб бўлмаётганди, ўпка касалланиши мумкинлигини айтишди. Машина юрмайди, қолсак, ўлишимиз аниқ. Таваккал — ўша ерга етиб бормасак бўлмайди.

Йўлда Мамажон ака лоп этиб йўқолиб қолди. «Ҳой Абдулазиз, мени ташлаб кетманглар, олиб кетинглар», деб бақирардилар. Бўй баробар қор тагига кириб кетибди. Юрманг деган жойидан юриб, ҳалиги жойда қор остига кириб кетибди. Қордан чиқариб олдик. Ичкарига, иссиққа кирганимиздан кейин нафас йўлини даволаш учун тўрт томчидан дори ичиришди. Ҳақиқатан ҳам нафас олиб бўлмаётганди, бир метр нари кўринмаётган эди.

Эни 2 метрлик иссиқ хонага жойлаштиришди. Биздан ташқари яна бир неча ўн киши бор эди. Орамизда бир келинчак ҳам бор эди — боласининг юзлари кўкариб кетган. Қутқарувчилар орасида яхши шифокори бор экан, дарров уколини қилди. Келинчак: «Қилманг!», деганига қарамай, шифокор: «Қоч! Боланг 2 соатда ё ўлади, ё қолади», деб барибир укол қилди. Боланинг кўкариши тарқаб, онасини эмишни бошлади.

Соат тонг 5:00 ларда ФВВнинг йигитлари бир ўрта ёшли аёлни икки километр масофадан елкада кўтариб келишди. Йигитлар ҳақиқий ҳалол ишлади...

Ухлаб қолибмиз. Соат 9:00 да турсак, ҳаво очилиб, шамоллар тўхтаган экан. Ташқарида -17 даража совуқ эканини айтишди. «Ўтириб туринг, йўл очилса, ўзимиз айтамиз. Соат 11:00 ларда очилиши мумкин, аммо аниқмас», деб айтишди. «Машинамизнинг олдига бориб турамиз», десак, рухсат беришди.

27 декабрга ўтар кечаси Қамчиқ довонида қолиб кетган фуқаро ҳикояси

Маълумотларга кўра, об-ҳавонининг кескин ўзгариши, қор ёғиши, бўрон бўлиши ва йўлнинг музлаши тўғрисида «Ўзгидромет»дан олдиндан маълумот олиниб, ижтимоий тармоқлар ва довондаги таблолар орқали ахборот берилмоқда, шунингдек, Қамчиқдаги автотураргоҳларда тушунтириш ишлари олиб борилмоқда.