O‘FF prezidenti Umid Ahmadjonov yangi reglament borasidagi “Daryo” savollariga javob qaytardi

Yangi yil arafasida O‘FF prezidenti Umid Ahmadjonovning “Gazeta.uz” nashri bilan suhbati e’lon qilindi. Unda bir qator keskin fikrlar aytilganidan kelib chiqib, tashkilot tartibni birinchi o‘ringa qo‘yayotganini tushunish mumkin edi.

O‘zbekistonda 4+1 ko‘rinishidagi legionerlar limiti amalda bo‘ladi. Endi xorijiy darvozabonga ham ruxsat bor

— Umid Mahamatjonovich, bundan avvalgi intervyuda ko‘p masalalar ochiqlangani uchun, aylantirib o‘tirmay, kerakli savollarni beramiz. Super Ligada 12 ta jamoa qoladi deyilgach, format uch marta o‘zgardi. Avvaliga 33 ta tur, keyin 38 ta tur deyildi. Eng so‘ngida esa 32 ta turlik format afzal bilindi. Buni qanday tushunish kerak?

— Aytaylik, biror tashkilot hali xom bo‘lgan rejasini ko‘r-ko‘rona himoya qilish uchungina yaxshi takliflarni rad qilaverishi to‘g‘rimi? Men unday deb o‘ylamayman. Siz aytayotgan yo‘nalishlar jamoatchilik muhokamasi uchun qo‘yildi va biz unga bo‘lgan munosabatlarni o‘rganib chiqish bilan mashg‘ul bo‘ldik. Yakunda esa eng muqobil variantda to‘xtalib, uni reglamentga kiritdik. Bunda asosiy masala qo‘nimsizlik emas, O‘FF rahbariyati futbol jamoatchiligining fikrini o‘rganib chiqib, asosli takliflarni inobatga olganida bo‘lishi kerak. Biz faqatgina mutaxassislar fikri bilan cheklanmay, oqilona fikr yuritadigan futbol muxlislaridan tortib, jurnalistlar bergan takliflarga qadar o‘rgandik hamda yakuniy qarorni e’lon qildik.

— Bu yaxshiku-ya, biroq qaysi 12 ta klub Super Ligada to‘p surishini qachon oshkor qilmoqchisizlar? Axir jamoalar yangi mavsumga tayyorgarlik ko‘rishi kerak...

— Nafaqat o‘sha 12 ta, balki qolgan klublar ham birdek tayyorgarlik ko‘raversin. Chunki biz faqatgina Super Liganing emas, Pro-Liganing ham saviyasini ko‘tarmoqchimiz. Xuddiki, biz nomini e’lon qilgan 12 ta klubdan boshqa hamma qo‘llarini siltab, mavsumga qo‘l uchida tayyorgarlik ko‘rishi kerak bo‘lmaganidek.

Biz qaysi 12 ta klubni olib qolsak ekan deb bosh qotirayotganimiz yo‘q. Bu haqda jamoalarning o‘zi o‘ylasin. Biz Super Liga klublari qanday talablarga javob berishi kerakligi borasida yo‘riqnoma yozib qo‘ydik. Endi jamoalar shu talablarga javob berish uchun urunib ko‘rishsin. Eplay olgan 12 tasini olib qolamiz. Chempionatni kuchli to‘rtlikda yakunlagan-u, ammo talabga javob bermagan klub ham Pro-Ligaga tushib ketaveradi.

Bu shuni bildiradiki, o‘tgan chempionat davomidagi raqobatdan ko‘ra ko‘proq, klublar o‘z infrotuzilmasini rivojlantirish borasida o‘zaro jiddiy raqobat olib boradi. Kimgadir yuqori divizion kerak bo‘lsa marhamat, buning uchun nimalar qilinishi kerakligi aniq belgilab qo‘yilgan.

O‘zbekiston Super Ligasining reglamenti tasdiqlandi. Endi zo‘rlar ichida zo‘r bo‘lgan klubga chempionlik nasib qiladi

— Agar yo‘q deb o‘tirsak, bundan keyin ham o‘tiraveramiz. Talabga javob bermaganlarni jazolasak, oldinga siljish bo‘ladi. To‘g‘ri, biz hamma o‘ziga kelib olishi uchun 2—3 yil vaqt berishimiz mumkin edi. Biroq men aniq bilamanki, bunda bemalol 2 yilni yo‘qotamiz. Chunki klublar hammasi taqalganida, eng oxirgi yilda harakatni boshlab qoladi. Agar biz talabni hozirdanoq qo‘ysak, ular ham hozirdan otni qamchilaydi. Mayli, bir-ikki klub muxlislari hafa bo‘lsin, vaqti kelib buning mohiyatini tushunib yetadi.

— Vadim Abramov masalasida hammasi tushunarli. Uning faoliyatida qoidalarga to‘g‘ri kelmaydigan nimadir bo‘lgan. Lekin jazolashni nega aynan undan boshlaganinglar qiziq...

— Shunchaki kimdir birinchi bo‘lishi kerak edi. Biz hammasini Abramovdan boshlash kerak demadik, shunga to‘g‘ri kelib qoldi. Tarixida siz aytgandek biror nojo‘ya jihati bor yana bir qator mutaxassislarni Abramovning taqdiri kutib turibdi. Bu borada ishimiz hali tugamadi, endi boshlandi.

— Yoshini kichiklashtirgan futbolchilar masalasida nima deya olasiz. Ular bilan ham shunchaki xayrlashiladimi?

— Biz o‘zimizning vakolat bo‘yicha jazolaymiz. Ya’ni, biz faqatgina futboldan chetlata olamiz. Siz nazarda tutayotgan jarayonlar bizning vakolatga kirmaydi. Shuning uchun ham, ishni Adliya vazirligiga topshirdik. Ular masalani yaxshilab o‘rganib chiqadi va o‘z vakolati bo‘yicha ish ko‘radi. Eng yaxshisi shu. Muhimi, bundan keyin o‘zbek futbolida bu kabi illatning bo‘lmasligi.

— Terma jamoa 2018-yil ikki jiddiy raqib bilan o‘ynaydi: Eron va Marokash. Biroq bosh murabbiyning o‘zi qani? Yana qancha kutish kerak?

— Biz shunchaki ikki raqib jamoa nomini aniq qildik. Yana 2 ta jiddiy o‘yin pishay-pishay deb qoldi. Aniq bo‘lsa, alohida xabar beramiz. Yevropaning eng nomdor termalaridan birini Toshkentga olib kelish ustida ish ketyapti. Bu o‘yin mahalliy futbol muxlislaridan hech kimning e’tiboridan chetda qolmaydi.

Murabbiy masalasida esa umuman shoshilmadik. Bu qiyin jarayon. Ba’zida nomdor murabbiyni olib kelasiz, katta pul berasiz. Lekin baribir natija ko‘rsata olmaydi, pulini olib, qaytib ketaveradi. Biz hozir nafaqat tajribali va o‘z imzosiga ega murabbiyni, shu bilan birga narxi ham bizni qanoatlantiradigan, biz qo‘ygan talablarga javob bera oladigan insonni topishimiz kerak. O‘ylashimcha, bunga oz qoldi.

— Bizning vazifamiz, o‘zimiz bilganimizcha kamchiliklarni ko‘rsatib berish. Endi biz siz aytayotgan ishlarning nazorati qanday kechayotganini kuzatib boramiz. Umid qilamizki, qonun-qoidadan tashqariga chiqqanlarni muqarrar jazo kutadi.

— So‘zsiz! Shusiz ishni tartibga solib bo‘lmaydi. Bunda jurnalistlarning o‘rni katta bo‘ladi. Agar mamlakat klublari o‘zimiz istayotgandek ko‘rinishga tezroq kelib olsa, chempionatning saviyasi sezilarli ravishda oshishi kerak. Bu esa o‘z navbatida milliy terma jamoani kuchaytiradi deb umid qilamiz.