Kanada sharqidagi Nyu-Bransuik provinsiyasida qisqichlariga Pepsi’ning logotipi tushirilgan qisqichbaqa qo‘lga olindi. Baliqchi Karissa Lindstrandning so‘zlariga ko‘ra, u tatuirovkaga o‘xshash suratni tezda tanib olgan, deb xabar berdi TJournal.
Lindstrand to‘rt yildan ortiqroq vaqtdan buyon qisqichbaqalarni tutish va ularni Nyu-Yorkka jo‘natish bilan shug‘ullanadi. Baliqchining aytishicha, u shu vaqtga qadar hech qachon tanasiga surat tushirilgan jonzotni ko‘rmagan, shu sababli “topilma” haqida Facebook’dagi do‘stlariga ma’lum qilgan.
Tarmoq foydalanuvchilari va baliqchining o‘zi qisqichda paydo bo‘lgan surat haqida o‘zlarining bir nechta taxminlarini keltirib o‘tdi. Ularning fikricha, bo‘g‘imoyoqlining qisqichi yumshoq bo‘lganida unga okeanga tashlab yuborilgan temir banka tiqilib qolgan. Boshqalarning yozishicha, Pepsi logotipi qutiga bo‘yoq yordamida chizilgan va u dengiz jonzotining qo‘liga bosilganida “aksi” qolgan.
Lindstrand avvaliga ushbu qisqichbaqani saqlab qolishni istagan, biroq keyinroq adashib ketib uni ham AQShga jo‘natiladigan qutilar ichiga solib yuborgan.
Izoh (0)