Toshkent viloyati Toshkent tumani (Keles)da 18-noyabr kuni 1999-yilda tug‘ilgan o‘quvchi qiz tomonidan pichoqlangan 47 yashar erkak oradan bir kun o‘tib vafot etgan. Bu haqda O‘zA xabar berdi.
Kollejda o‘qiydigan keleslik o‘quvchi qiz uning telefon raqamini begona erkaklarga tarqatgan 47 yashar qo‘shnisini jahl ustida pichoqlab qo‘ygani, hodisa yuzasidan Jinoyat kodeksining 104-moddasi 1-qismi bilan jinoyat ishi qo‘zg‘atilgani haqida Toshkent viloyati IIB matbuot xizmati 19-noyabr kuni xabar bergan edi.
IIB matbuot xizmati xabarida jabrlanuvchi og‘ir tan jarohati olib, shifoxonaga yotqizilgani ma’lum qilingan, biroq uning joriy ahvoli haqida ma’lumot berilmagan edi. O‘zA 22-noyabr kuni viloyat IIB huzuridagi Tergov bo‘limiga asoslanib tarqatgan axborotga ko‘ra, jabrlanuvchi 19-noyabr kuni shifoxonada vafot etgan.Toshkent tumani IIB huzuridagi Tergov bo‘limi tergovchisi, leytenant Nozim Yo‘ldoshevning so‘zlariga ko‘ra, jinoyat ishi qayta tavsiflangan va hozirda Jinoyat kodeksining 104-moddasi 3-qism “d” bandi bilan tergov harakatlari olib borilmoqda.
Izoh (0)