Rossiya mudofaa vazirligi videoo‘yin skrinshotlarini e’lon qilishda unvoni yo‘q xodimni aybladi. Va navbatdagi “rad etib bo‘lmas” dalilni namoyish etdi

Rossiya mudofaa vazirligi Twitter’dagi sahifasida IShID terrorchilarining suratlari o‘rniga videoo‘yin skrinshotlari e’lon qilinishi bilan bog‘liq holatni tekshirmoqda. Tekshiruv harbiy unvonga ega bo‘lmagan fuqaroviy xodimlardan biriga nisbatan olib borilmoqda, deb xabar beradi Meduza.

Muqaddam mudofaa vazirligi “Qo‘shma Shtatlar tomonidan IShIDning jangga qodir otryadlari ta’minlanayotganining rad etib bo‘lmas dalillari”ni e’lon qilgan edi. Ammo suratlardan biri AC-130 Gunship Simulator: Special Ops Squadron mobil o‘yinidan olingan skrinshot ekani ma’lum bo‘ldi. Matbuotda bu borada xabarlar chiqqanidan so‘ng Rossiya mudofaa vazirligi ijtimoiy tarmoqlardan ushbu suratlarni o‘chirib tashladi. Endilikda voqea taftish qilinayotgani ma’lum bo‘ldi.

Shunga qaramay, Rossiya harbiy idorasi AQSh terrorchilarga yordam berayotganini ta’kidlamoqda. Yangi bayonotda 9-noyabr kuni AQSh qo‘mondonligi Abu Kamol shahri yaqinida terrorchilarga zarba berishdan bosh tortgani ta’kidlandi.

Vazirlik, shuningdek, amerikaliklar terrorchilar bilan hamkorlik qilayotganiga yangi “rad etib bo‘lmas” dalillar keltirdi. Ammo yangi dalillar ham ijtimoiy tarmoq foydalanuvchilari tomonidan shubha bilan qarshi olindi.

#СИРИЯ Минобороны России публикует неоспоримое подтверждение обеспечения Соединенными Штатами прикрытия боеспособных отрядов ИГИЛ для использования их в продвижении американских интересов на Ближнем Востоке https://t.co/SH9eWkgNlN pic.twitter.com/vIRvRStBEP

— Минобороны России (@mod_russia) November 14, 2017

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.