Россия мудофаа вазирлиги видеоўйин скриншотларини эълон қилишда унвони йўқ ходимни айблади. Ва навбатдаги «рад этиб бўлмас» далилни намойиш этди

Россия мудофаа вазирлиги Twitter’даги саҳифасида ИШИД террорчиларининг суратлари ўрнига видеоўйин скриншотлари эълон қилиниши билан боғлиқ ҳолатни текширмоқда. Текширув ҳарбий унвонга эга бўлмаган фуқаровий ходимлардан бирига нисбатан олиб борилмоқда, деб хабар беради Meduza.

Муқаддам мудофаа вазирлиги «Қўшма Штатлар томонидан ИШИДнинг жангга қодир отрядлари таъминланаётганининг рад этиб бўлмас далиллари»ни эълон қилган эди. Аммо суратлардан бири AC-130 Gunship Simulator: Special Ops Squadron мобил ўйинидан олинган скриншот экани маълум бўлди. Матбуотда бу борада хабарлар чиққанидан сўнг Россия мудофаа вазирлиги ижтимоий тармоқлардан ушбу суратларни ўчириб ташлади. Эндиликда воқеа тафтиш қилинаётгани маълум бўлди.

Шунга қарамай, Россия ҳарбий идораси АҚШ террорчиларга ёрдам бераётганини таъкидламоқда. Янги баёнотда 9 ноябрь куни АҚШ қўмондонлиги Абу Камол шаҳри яқинида террорчиларга зарба беришдан бош тортгани таъкидланди.

Вазирлик, шунингдек, америкаликлар террорчилар билан ҳамкорлик қилаётганига янги «рад этиб бўлмас» далиллар келтирди. Аммо янги далиллар ҳам ижтимоий тармоқ фойдаланувчилари томонидан шубҳа билан қарши олинди.

#СИРИЯ Минобороны России публикует неоспоримое подтверждение обеспечения Соединенными Штатами прикрытия боеспособных отрядов ИГИЛ для использования их в продвижении американских интересов на Ближнем Востоке https://t.co/SH9eWkgNlN pic.twitter.com/vIRvRStBEP

— Минобороны России (@mod_russia) November 14, 2017

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.