14-noyabr kuni Rossiya mudofaa vazirligi Twitter’dagi sahifasida “Qo‘shma Shtatlar tomonidan IShIDning jangga qodir otryadlari ta’minlanayotganining rad etib bo‘lmas dalillari”ni e’lon qildi. Bu haqda Meduza xabar bermoqda.
Ushbu oq-qora suratlar 9-noyabr kuni Suriyadagi Abu Kamol shahri atrofida suratga tushirilgani aytildi.
Conflict Intelligence Team (CIT) tadqiqot guruhi chop etilgan suratlardan biri AC-130 Gunship Simulator: Special Ops Squadron mobil o‘yinidan olingan skrinshot ekanligiga e’tibor qaratdi.
Mudofaa vazirligi tomonidan e’lon qilingan fotoning yuqori o‘ng burchagida Development footage. This is a work in progress. All content subject to change degan yozuvni ko‘rish mumkin. Xuddi shunday yozuv o‘yinda ham chiqadi.
Vazirlik chop etgan suratlarning bir qismi Iroq harbiylari tomonidan 2016-yil sentabrida Fallujada olingan video kadrlaridir. Rolikda IShID jangarilarining hujumi aks etgan.
Matbuotda bu borada xabarlar chiqqanidan so‘ng Rossiya mudofaa vazirligi ijtimoiy tarmoqlardan ushbu suratlarni o‘chirib tashladi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)