14 ноябрь куни Россия мудофаа вазирлиги Twitter’даги саҳифасида «Қўшма Штатлар томонидан ИШИДнинг жангга қодир отрядлари таъминланаётганининг рад этиб бўлмас далиллари»ни эълон қилди. Бу ҳақда Meduza хабар бермоқда.
Ушбу оқ-қора суратлар 9 ноябрь куни Суриядаги Абу Камол шаҳри атрофида суратга туширилгани айтилди.
Conflict Intelligence Team (CIT) тадқиқот гуруҳи чоп этилган суратлардан бири AC-130 Gunship Simulator: Special Ops Squadron мобил ўйинидан олинган скриншот эканлигига эътибор қаратди.
Мудофаа вазирлиги томонидан эълон қилинган фотонинг юқори ўнг бурчагида Development footage. This is a work in progress. All content subject to change деган ёзувни кўриш мумкин. Худди шундай ёзув ўйинда ҳам чиқади.
Вазирлик чоп этган суратларнинг бир қисми Ироқ ҳарбийлари томонидан 2016 йил сентябрида Фаллужада олинган видео кадрларидир. Роликда ИШИД жангариларининг ҳужуми акс этган.
Матбуотда бу борада хабарлар чиққанидан сўнг Россия мудофаа вазирлиги ижтимоий тармоқлардан ушбу суратларни ўчириб ташлади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)