Qirg‘iziston Bosh prokuraturasi “Respublika — Ota yurt” partiyasi yetakchisi O‘murbek Bobonovga nisbatan jinoiy ish qo‘zg‘adi. Bu haqda “TASS” xabar bermoqda.
Bosh prokuratura axborotiga ko‘ra, jinoiy ish “Konstitutsiyaviy tuzumni ag‘darishga ochiqdan-ochiq da’vat etish” va “Milliy va diniy adovat qo‘zg‘atish” moddalari bo‘yicha ochilgan.
Xabar berishlaricha, Bobonov bu qonunbuzarliklarni prezident saylovi arafasidagi saylovoldi tashviqotida — saylovchilar bilan sentabr oyida bo‘lib o‘tgan uchrashuvda sodir etgan.
Bobonov 15-oktabr kuni bo‘lib o‘tgan Qirg‘iziston prezidenti saylovida prezidentlikka nomzod sifatida ishtirok etdi. U saylovchilarning 33,5 foiz ovozini qo‘lga kiritib, saylovda ikkinchi bo‘ldi.
Saylovda nomzodi amaldagi prezident — Almazbek Atambayevning jamoasi — Qirg‘iziston sotsial-demokratik partiyasidan ilgari surilgan So‘ronboy Jeenbekov g‘olib chiqdi. U saylovchilarning 54 foiz ovozini oldi.
Izoh (0)