Buyuk Britaniyada yirik aviakompaniya bankrotlik e’lon qildi. 110 mingdan ortiq odam uyiga qayta olmayapti

Buyuk Britaniyada charter reyslar bilan shug‘ullanuvchi Monarch Airlines aviakompaniyasi o‘z parvozlarini to‘xtatdi, deb xabar berdi Meduza.

Fuqarolik aviatsiyasining hisob-kitoblariga ko‘ra, xorijda Buyuk Britaniyaga qaytarish lozim bo‘lgan 110 mingdan ortiq odam Monarch Airlines reyslarining chiptalari bilan qolishgan. Yana ushbu aviakompaniya reyslariga 300 mingga yaqin chipta bron qilingan.

Yo‘lovchilar sonidan kelib chiqiladigan bo‘lsa, gap Buyuk Britaniyadagi aviakompaniyaning “yirik sinishi” haqida ketmoqda.

Fuqarolik aviatsiyasi boshqarmasi hukumatga Monarch Airlines yo‘lovchilarini tashish uchun 30 ga yaqin samolyot so‘rab murojaat qildi.

2-oktabrga o‘tar kechasi Monarch Airlines aviakompaniyasining turistik sayohatlar tashkilotchisi sifatida xizmat ko‘rsatish imkonini beruvchi litsenziyasining muddati tugagan. Aviakompaniya litsenziyani uzaytirishning imkonini topa olmagan.

Monarch Airlines kompaniyasiga 1968-yilda asos solingan bo‘lib, u Buyuk Britaniyadagi beshta aeroportdan 40 ta yo‘nalish bo‘yicha parvozlarni amalga oshirar edi. Aviakompaniyada 2,7 mingga yaqin odam ishlaydi.