Markaziy bank va O‘zbekiston banklar assotsiatsiyasi banklararo chakana to‘lov tizimida mijozlarga xizmat ko‘rsatishda “so‘m” plastik kartochkalari orqali hisob-kitoblarni amalga oshirishda bank va nobank kredit tashkilotlari uchun amaldagi tavsiyaviy tariflar rejasiga ayrim o‘zgarish va qo‘shimchalar kiritdi. Bu haqda Markaziy bank axborot xizmati ma’lum qildi.
Markaziy bank xabarda qayd etilishicha, joriy etilgan tarif rejasiga ko‘ra, yuridik shaxslar va yakka tartibdagi tadbirkorlarning to‘lov terminallari uchun to‘laydigan ijara haqi ilgari mos ravishda 5 va 2,5 yevrogacha ekvivalentda o‘rnatilgan bo‘lsa, endilikda ular so‘mga o‘tkazilib, mos ravishda 25 ming va 15 ming so‘m etib belgilandi.
Jismoniy shaxslarga yo‘qotilgan yoki shikastlangan plastik kartochkalari o‘rniga yangisi berilsa, 10 ming so‘mgacha, yuridik va yakka tartibdagi tadbirkorlardan 15 ming so‘mgacha haq olish tavsiya etildi. Avval bu xizmatlar uchun jismoniy shaxslardan 5 yevro ekivalentigacha, yuridik va yakka tartibdagi tadbirkorlardan esa 10 yevrocha ekvivalentda haq olinardi.
Yuridik shaxs va yakka tartibdagi tadbirkor uchun korporativ plastik kartochkani emissiya qilishda tijorat banklari 5 yevrogacha ekvivalentda haq olingan bo‘lsa, yangi tavsiyalarga muvofiq bu xizmat turiga o‘rnatilgan tarif 15 ming so‘mni tashkil qiladi.
Jismoniy shaxslar plastik kartochkalarini (ish haqi, pensiya, nafaqa, stipendiya va oilaviy kartochkalar)ni emissiya qilish, plastik kartochkalarni blokirovka qilish, shu jumladan, “stop-list”ga qo‘yish va chiqarish kabi xizmatlar avvalgidek bepul ko‘rsatiladigan bo‘ldi.
“Tijorat banklari plastik kartochkalardan foydalanuvchilarning ularni ishlatishdan manfaatdorligini oshirishga yo‘naltirilgan turli xil bonus, diskont va rag‘batlantiruvchi xizmatlarni amaliyotga tadbiq etish borasidagi ishlari izchil davom ettiradi”, — deyiladi xabarda.
Izoh (0)