Turizm qurbonlari: Tailandda har yili 3 mingga yaqin gibbon o‘ldiriladi

Janubi-Sharqiy Osiyo davlatlari, xususan, Tailandda gibbonlar sayyohlarni jalb etish vositasi bo‘lib xizmat qiladi. Bunday faoliyat noqonuniy bo‘lishiga qaramay, plyajlarda sayyohlarga arzimagan haq evaziga maymun bilan suratga tushish taklifiga bot-bot duch kelish mumkin. Bu haqda National Geographic xabar bermoqda.

Pxuket orolidagi gibbonlarni reabilitatsiya qilish loyihasi rahbarining o‘rinbosari Timp-parat Mingpaynga ko‘ra, tay ovchilari har yili 3 mingga yaqin jonivorni yo‘q qiladi. Brakonyerlar gibbon bolalari onasi bilan bir yilgacha yashashidan foydalanadi va ov davomida aynan urg‘ochini nishonga oladi.

“Odatda ovchilar bitta bolani qo‘lga kiritish uchun maymunlarning kamida uchta oilasini yo‘q qiladi. Kattalarini chaqaloqlarni himoya qilmoqchi bo‘lganida o‘ldirishadi, bolalar esa daraxtdan qulab, halok bo‘ladi”, — deya hikoya qiladi Mingpayn.

Egalari gibbonlardan 4—5 yoshgacha foydalanadi. Bu yoshda ularning qoziqtishlari chiqadi, tajovuzkor bo‘lib qoladi va sayyohlarni cho‘chitadi. Bunday gibbonlar odatda o‘ldiriladi yoki ko‘chaga uloqtiriladi.