Interpol IShID terrorchilik tashkilotining Yevropaga borib, u yerda terrorchilik hujumlarini uyushtirishi mumkin bo‘lgan 173 nafar jangarisining ro‘yxatini e’lon qildi. Bu haqda The Guardian’ga tayanib, “Interfaks” xabar berdi.
Ushbu ma’lumotlar Suriya hamda Iroqdagi Amerika razvedkasi tomonidan olingan va FQBga, shundan so‘ng Xalqaro jinoiy politsiya tashkilotiga (Interpol) topshirilgan.
Razvedka tashkiloti IShID Yaqin Sharqda mag‘lubiyatga uchrayotgani sabab uning jangarilari borgan sari xudkushlikni amalga oshirish uchun Yevropaga kelishidan xavfsiramoqda. Shu bilan birga Interpolda yuqoridagi odamlar ayni vaqtda Yevropada emasligi borasida hech qanday ma’lumot yo‘q.
Ro‘yxatdan joy olgan terrorchilarga “ko‘plab qurbonliklarga olib keladigan qo‘lbola portlovchi qurilmalarni yig‘ishni va ularni joylashtirishni o‘rgata oladi” deya ta’rif berilgan. Taxminlarga ko‘ra, ular o‘z terrorchilik faoliyatida ishtirok etish uchun dunyo bo‘ylab sayohat qilishi mumkin.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)