Eronning 4-jamoasini yenga olmagan O‘zbekiston, bugun Saudiyaning 7-jamoasi bilan o‘ynaydi

Turkiyada o‘quv-mashg‘ulot yig‘ini olib borayotgan Samvel Babayan boshqaruvidagi O‘zbekiston milliy terma jamoasi bugun — 22-iyul kuni o‘zining ikkinchi o‘rtoqlik o‘yinida maydonga tushadi.

“Championat.asia” saytining ma’lumot berishicha, O‘zbekiston terma jamoasining bugungi raqibi Saudiya Arabistonining “At-Taavun” futbol klubi bo‘ladi. Mazkur jamoa Saudiya chempionatini 7-o‘rinda yakunlagandi.

“At-Taavun” futbol klubini o‘zbekistonlik futbol muxlislari “Lokomotiv”ga qarshi o‘yinlari orqali biladi. “Al-Ittihod” klubining Chempionlar ligasidan chetlatilishi sabab, “At-Taavun” kutilmaganda shu musobaqada paydo bo‘lib qolgan va ikki o‘yinda “Lokomotiv”ni 5 ochkodan mahrum qilgandi. Saudiyada “temiryo‘lchilar” 0:1 hisobida yengilgan, Toshkentda 4:4 hisobi qayd etilgandi.

Avvalroq O‘zbekiston milliy terma jamoasi Eron chempionatini 4-o‘rinda yakunlagan va “Bunyodkor”ni shu yil ikki martta yenggan “Zob Ohan” klubi bilan o‘ynab, 0:1 hisobida mag‘lub bo‘lgandi.