Эроннинг 4-жамоасини енга олмаган Ўзбекистон, бугун Саудиянинг 7-жамоаси билан ўйнайди

Туркияда ўқув-машғулот йиғини олиб бораётган Самвел Бабаян бошқарувидаги Ўзбекистон миллий терма жамоаси бугун — 22 июль куни ўзининг иккинчи ўртоқлик ўйинида майдонга тушади.

«Championat.asia» сайтининг маълумот беришича, Ўзбекистон терма жамоасининг бугунги рақиби Саудия Арабистонининг «Ат-Таавун» футбол клуби бўлади. Мазкур жамоа Саудия чемпионатини 7-ўринда якунлаганди.

«Ат-Таавун» футбол клубини ўзбекистонлик футбол мухлислари «Локомотив»га қарши ўйинлари орқали билади. «Ал-Иттиҳод» клубининг Чемпионлар лигасидан четлатилиши сабаб, «Ат-Таавун» кутилмаганда шу мусобақада пайдо бўлиб қолган ва икки ўйинда «Локомотив»ни 5 очкодан маҳрум қилганди. Саудияда «темирйўлчилар» 0:1 ҳисобида енгилган, Тошкентда 4:4 ҳисоби қайд этилганди.

Аввалроқ Ўзбекистон миллий терма жамоаси Эрон чемпионатини 4-ўринда якунлаган ва «Бунёдкор»ни шу йил икки мартта енгган «Зоб Оҳан» клуби билан ўйнаб, 0:1 ҳисобида мағлуб бўлганди.