Xorazmda o‘simlik moyi bilan savdo qiluvchi soxta tadbirkor soliq inspektorlariga jarohat yetkazdi
O‘zbekiston Respublikasining mavjud qonunchiligiga ko‘ra, un, shakar, yog‘, margarin, quruq sut, bolalar oziq-ovqati, choy, makaron, qandolat mahsulotlari, go‘sht, baliq, pishloq, kolbasa mahsulotlari, spirtsiz ichimliklar bilan savdo qilishda mulkiy shakllardan qat’i nazar barcha zaruriy uskunalar bilan jihozlangan, savdo qoidalariga rioya qilgan holda, mahsulotning yaroqlilik muddati, sifatiga tegishli sertifikatlar, shuningdek, qonunchilikda o‘rnatilgan boshqa talablarga javob bergan taqdirdagina statsionar savdo tashkilotlarida jismoniy hamda yuridik shaxslar tomonidan amalga oshiriladi, deb xabar berdi Davlat soliq qo‘mitasining matbuot xizmati.
Shu bilan birga o‘simlik moyi, spirtli ichimliklar va tamaki mahsulotlari bilan savdo nazorat kassa apparatlari va hisob terminallari o‘rnatilgan, yuridik shaxs shaklida chakana savdo qiladigan statsionar savdo nuqtalarida amalga oshiriladi.
Biroq kichik biznes hamda xususiy tadbirkorlikda O‘zbekiston Respublikasi qonunchiligini chetlab o‘tadigan, o‘zining foydasini ko‘zlab adolatli raqobat muhitini buzadiganlar ham uchrab turadi.
Masalan, Xorazm viloyati Urganch shahrida davlat soliq inspeksiyasi xodimlarining vakolatli tarmoq vakillari bilan birgalikda M.Xudoyberganov ko‘chasida o‘tkazgan nazorat tadbiri davomida, ushbu ko‘chaga o‘simlik moyi bilan savdo qiluvchi beshta kichik o‘lchamli maxsus bino qurilgani ma’lum bo‘ldi. Xususan, Sh.R. ismli fuqaro sanitar talablarga javob bermagan holda 295 litr o‘simlik moyini sotgani uchun unga nisbatan o‘rnatilgan tartiblarga ko‘ra dalolatnoma tuzildi.
Fuqaro Sh.R. o‘zining noqonuniy faoliyatini tan olish o‘rniga, o‘simlik moyining musodara qilinishiga to‘sqinlik qilib, to‘polon ko‘tardi. Shu bilan birga u o‘zi kabi noqonuniy tadbirkorlarni va boshqa manfaatdor shaxslarni yoniga chaqirib, sun’iy ravishda mojaroli vaziyatni yaratishga harakat qildi. Nazorat tadbiri davomida soxta tadbirkor Sh.R. o‘z vazifasini bajarayotgan davlat soliq qo‘mitasining xodimlariga tan jarohat yetkazdi. Ayni vaqtda sodir etilgan ushbu jinoiy harakat bilan Urganch shahrining ichki ishlar bo‘limi shug‘ullanmoqda.
