O‘zbekistonda 15-iyuldan gaz tariflari oshiriladi

“O‘zbekneftgaz” kompaniyasi aholiga yetkazib beriladigan tabiiy gaz tariflari 15-iyuldan oshirilishini ma’lum qildi. Yangi narxlar Moliya vazirligi tomonidan 29-iyun kuni tasdiqlangan.

Kelasi oydan boshlab, gaz hisoblagichi bo‘lgan taqdirda, 10 kubometr tabiiy gaz qiymati 2634 so‘mni tashkil etadi (hozirda — 2461,2 so‘m; narx o‘sishi — 7 foiz).

Hisoblagich bo‘lmagan taqdirda, taom tayyorlash va issiq suv ta’minoti uchun foydalaniladigan gazning 10 kubometri qiymati 4555,9 so‘mni (hozir — 4225,9 so‘m; o‘sish — 7,8 foiz), isitish uchun esa 2112,45 so‘mni (hozir 1973,7 so‘m; o‘sish — 7 foiz)ni tashkil etadi.

Tariflarning to‘liq ro‘yxati bilan bu yerda tanishish mumkin.

“Gazeta.uz”ning yodga solishicha, gaz va boshqa kommunal xizmatlarning tariflari so‘nggi bor 2016-yil oktabr oyida oshirilgan edi.