Rossiya mezbonlik qilayotgan futbol bo‘yicha Konfederatsiyalar kubogiga Yevropaning amaldagi chempioni sifatida tashrif buyurgan Portugaliya terma jamoasi o‘z yurishiga yarim finalda yakun yasadi.
Hal qiluvchi o‘yin ostonasida Krishtianu Ronaldu jamoadoshlari Copa America g‘olibi hisoblangan Chiliga qarshi saf tortdi. Uchrashuv 120 daqiqa davom etdi va futbolchilarning hech biriga gol urish nasib qilmadi.
Shu tariqa eronlik Alirizo Fag‘oniy boshqarib borgan uchrashuv g‘olibi penaltilar seriyasiga ko‘ra aniqlanadigan bo‘ldi.
Lotereyada omad Chiliga kulib boqdi. Amerikaliklar ketma-ket uch zarbani aniq amalga oshirgan bo‘lsa, portugaliyaliklarda shuning aksi kuzatildi. Jamoa yetakchisi Krishtianu Ronaldu beshinchi penaltini tepish istagida bo‘lsa-da, ungacha navbat yetib kelmadi. “Manchester Siti” darvozaboni Klaudio Bravoning aniq harakatlari Chilini finalga olib chiqdi.
Portugaliya terma jamoasi “A” guruhini 7 ochko bilan peshqadam sifatida yakunlagandi. Fernandu Santush shogirdlari Rossiyani 1:0 va Yangi Zelandiyani 4:0 hisobida taslim qilgan bo‘lsa, turnirni Meksikaga qarshi durang bilan boshlagandi — 2:2.
“B” guruhida ishtirok etgan Chili termasi esa 5 ochko to‘pladi va Portugaliya kabi mag‘lubiyat nimaligini bilmadi. Xuan Antonio Pitssi boshchilik qilayotgan jamoa ilk turda Kamerun ustidan 2:0 hisobida zafar quchgan bo‘lsa, keyinroq Germaniya va Avstraliya termalari bir bir xilda — 1:1 hisobida durang o‘ynagandi. Navbatdagi during Chilini final sari yetakladi.
Konfederatsiyalar kubogida yarim finalning ikkinchi o‘yini bugun — 29 iyun kuni 23:00 da boshlanadi. Unda Germaniya termasi Meksikaga qarshi kurash olib boradi.
Konfederatsiyalar kubogi Yarim final 28-iyun, chorshanba
Izoh (0)