Россия мезбонлик қилаётган футбол бўйича Конфедерациялар кубогига Европанинг амалдаги чемпиони сифатида ташриф буюрган Португалия терма жамоаси ўз юришига ярим финалда якун ясади.
Ҳал қилувчи ўйин остонасида Криштиану Роналду жамоадошлари Copa America ғолиби ҳисобланган Чилига қарши саф тортди. Учрашув 120 дақиқа давом этди ва футболчиларнинг ҳеч бирига гол уриш насиб қилмади.
Шу тариқа эронлик Алиризо Фағоний бошқариб борган учрашув ғолиби пенальтилар сериясига кўра аниқланадиган бўлди.
Лотереяда омад Чилига кулиб боқди. Америкаликлар кетма-кет уч зарбани аниқ амалга оширган бўлса, португалияликларда шунинг акси кузатилди. Жамоа етакчиси Криштиану Роналду бешинчи пенальтини тепиш истагида бўлса-да, унгача навбат етиб келмади. «Манчестер Сити» дарвозабони Клаудио Бравонинг аниқ ҳаракатлари Чилини финалга олиб чиқди.
Португалия терма жамоаси «А» гуруҳини 7 очко билан пешқадам сифатида якунлаганди. Фернанду Сантуш шогирдлари Россияни 1:0 ва Янги Зеландияни 4:0 ҳисобида таслим қилган бўлса, турнирни Мексикага қарши дуранг билан бошлаганди — 2:2.
«B» гуруҳида иштирок этган Чили термаси эса 5 очко тўплади ва Португалия каби мағлубият нималигини билмади. Хуан Антонио Пицси бошчилик қилаётган жамоа илк турда Камерун устидан 2:0 ҳисобида зафар қучган бўлса, кейинроқ Германия ва Австралия термалари бир бир хилда — 1:1 ҳисобида дуранг ўйнаганди. Навбатдаги дуринг Чилини финал сари етаклади.
Конфедерациялар кубогида ярим финалнинг иккинчи ўйини бугун — 29 июнь куни 23:00 да бошланади. Унда Германия термаси Мексикага қарши кураш олиб боради.
Конфедерациялар кубоги Ярим финал 28 июнь, чоршанба
Изоҳ (0)