Noma’lum shaxs 2017-yil 29-martda fuqaro Yaminovning Sergeli tumanida joylashgan xonadoniga eshik qulfiga kalit tanlash yo‘li bilan, g‘ayriqonuniy ravishda kirib, jami 3 million 133 ming so‘mlik mol-mulkini o‘g‘irlab ketgan. Holat bo‘yicha Sergeli tumani IIB huzuridagi Tergov bo‘limi tomonidan Jinoyat Kodeksining 169-moddasi 2-qismi “g” bandi bilan jinoyat ishlari qo‘zg‘atilgan. Bu haqda Toshkent shahar IIBBda bo‘lib o‘tgan brifingda ma’lum qilindi.
Toshkent shahar IIBB xodimlari tomonidan olib borilgan tergov-tezkor tadbirlari natijasida, mazkur jinoyat muqaddam o‘g‘rilik va giyohvandlik vositalarini noqonuniy muomalasi jinoyatlari bilan sudlangan Sergey Zavodskoy va Aleksandr Buzichkin tomonidan sodir etilgani aniqlanib, ulardan turli xildagi kalitlar to‘plami va qo‘lqoplar daliliy ashyo sifatida olingan.
Bundan tashqari, Zavodskoy va Buzichkin Toshkent shahri hududida kalit tanlash yo‘li bilan bir nechta o‘g‘rilik jinoyatlarini sodir etganligi aniqlandi.
Mazkur jinoiy guruh a’zolariga nisbatan qamoqqa olish tarzidagi ehtiyot chorasi qo‘llanilgan bo‘lib, boshqa jinoyatlarga aloqadorligi tekshirilmoqda.
Toshkent shahar IIBB mazkur shaxslardan jabr ko‘rgan fuqarolar bo‘lsa, ichki ishlar idoralariga murojaat etishni so‘raydi.
Yuqoridagi holatlar bo‘yicha jabrlanuvchining anketa ma’lumotlari o‘zgartirilgan bo‘lib, familiya va ismning har qanday o‘xshashligi tasodifiy xarakterga ega.
Izoh (0)