Porsche Leypsigdagi (Germaniya) o‘ziga tegishli hududda har birida taxminan 60 ming asalari yashaydigan 25 ta koloniyani joylashtirdi. Shu tariqa kompaniya 1,5 million hasharotga boshpana berdi, deya hikoya qiladi “Motor”.
Asalari xo‘jaligi Porsche sinov trassasi hududida joylashgan. Kompleks jami 132 gektar maydonni egallagan bo‘lib, bundan 40 gektari xo‘jalik uchun ajratib berildi.
Porsche mutasaddilariga ko‘ra, kompaniya Germaniyada asalarilar soni keskin kamayib ketgani uchun shunday qarorga kelgan: mamlakatda asalari koloniyalari soni 1952-yildagi 2,5 milliondan hozirda bir millionga ham yetmagan darajaga tushib qolgan.
Bitta asalari koloniyasi har yili 55 kilogramm asal berishi mumkin. Demak, hasharotlar kompaniyaga yiliga 1375 kilogramm mahsulot yetkazib beradi. Asaldan Porsche’ning oshxonalarida foydalaniladi, shuningdek, kompaniyaning Leypsigdagi mijozlar markazida sotiladi.
Qayd etish joizki, Porsche’ning Leypsigdagi hududida 75 ta zubr va 27 ta ot ham istiqomat qiladi.
Izoh (0)