Rossiyada 1-iyundan taksi, avtobus, “marshrutka” va yuk mashinalari haydovchilarining xorijiy haydovchilik guvohnomalari bilan ishlashini taqiqlovchi qonun kuchga kirdi. Qonun 2013-yildayoq qabul qilingan, biroq uning kuchga kirishi muntazam kechiktirib kelinayotgan edi. Shunga qaramay, Rossiyada mehnat qilayotgan minglab haydovchilarga ushbu qonun ta’sir ko‘rsatdi va mamlakatning yirik shaharlarida vaqtinchalik taksi yetishmovchiligi yuzaga keldi, deb yozadi Meduza.
1-iyundan kuchga kirgan qonun chet elliklarga, agar ularda Rossiyada berilgan haydovchilik guvohnomalari bo‘lmasa, haydovchi bo‘lib ishlashni taqiqlaydi. Rossiya Davlat dumasi tomonidan qabul qilingan va prezident Vladimir Putin tomonidan imzolangan qonunda haydovchilik guvohnomasini Rossiyada olmagan shaxslarga “transport vositalarini boshqarish bilan bevosita bog‘liq tadbirkorlik va mehnat faoliyatini amalga oshirish vaqtida transport vositasini boshqarish” taqiqlanishi yozib qo‘yilgan. Shunday qilib, mazkur qonun Rossiyada taksi, “marshrutka” yoki boshqa jamoat transporti haydovchisi bo‘lib ishlayotgan minglab chet elliklarni ishsiz qoldirdi.
Agar ularning bari ishini davom ettirishni istasa, haydovchilik guvohnomasi uchun qaytadan imtihon topshirishi kerak bo‘ladi — bitta nazariy imtihon va ikkita amaliy (biri avtodromda, ikkinchisi esa shahar bo‘ylab harakat sharoitida). Rossiyaniki bo‘lmagan haydovchilik guvohnomasi bilan avtomobilni boshqarish uchun jarima miqdori 5 mingdan 15 ming rublgacha yetadi. Chet ellik haydovchiga ish beruvchi esa 50 ming rublgacha jarimaga tortilishi mumkin.
Rossiyalik deputatlar qonunning joriy etilishini xalqaro normalarga, xususan, Yo‘l harakati to‘g‘risidagi Vena konvensiyasi talablariga muvofiq kelish zarurati bilan oqlagan. Deputatlar ushbu qonun konvensiyaning aynan qaysi bandiga muvofiq kelishga yordam berishini ma’lum qilmadi — Vena kelishuvida xorijiy haydovchilik guvohnomasi bilan taksi haydab bo‘lmasligi haqida biror gap yo‘q.
1 va 2-iyun kunlari butun Rossiya bo‘ylab o‘n minglab haydovchilar ishga chiqmadi. Davlat dumasining qonunchilik masalalari bo‘yicha qo‘mitasi raisi birinchi o‘rinbosari va avtomobilchilarning “Tanlov erkinligi” jamoatchilik tashkiloti raisi Vyacheslav Lisakovning ma’lum qilishicha, “o‘n minglab” haydovchilar Rossiyada ishlash huquqidan mahrum bo‘lgan. “Yedinaya Rossiya” fraksiyasi a’zosi va Davlat dumasining transport masalalari bo‘yicha qo‘mitasi rahbari Yevgeniy Moskvichevning ma’lum qilishicha, Rossiyada yollanib ishlayotgan 120 ming haydovchidan kamida 70 ming nafarida Rossiya namunasidagi haydovchilik guvohnomalari yo‘q. “Sensatsiya bo‘lmaydi, transport sohasi to‘xtab qolmaydi. Ishlashni istaganlar, haydovchilik guvohnomasini almashtiradi, qolganlar esa qaytib ketadi”, — dedi Moskva avtomaktablar ittifoqi raisi Aleksandr Achkasov.
Moskva Savdo-sanoat palatasi ma’lumotlariga ko‘ra, Moskva shahrida 1-iyundan beri 20 foiz haydovchi ishga chiqmayapti. Moskvadagi yirik taksi parklaridan biri — Nexi’ning boshqaruvchi direktori Oleg Kostrubinning tasdiqlashicha, 1-iyundan boshlab avtokorxonaning 25 foiz haydovchisi — asosan Belarus va O‘rta Osiyo respublikalari fuqarolari ishga chiqa olmayapti. Sankt-Peterburgdagi “Blagost” taksi xizmati boshqaruvchisi Artyom Ponyatov taksopark haydovchilarining uchdan biri — Rossiya namunasidagi haydovchilik guvohnomasiga ega bo‘lmagan xorijiylardir.
Rossiyaning boshqa hududlaridagi taksi parklari ham shunday muammolarga duch kelgan. Kaliningrad viloyatida esa ish mahalliy DAN rahbariyati “masala yakuniy hal etilmaguniga qadar” Rossiya namunasidagi haydovchilik guvohnomasi bo‘lmagan haydovchilarni ishga olgan ish beruvchilarni javobgarlikka tortmaslikka va’da berishigacha borib yetgan.
Rasman chet ellik haydovchilarda o‘z guvohnomalarini Rossiya namunasidagi hujjatlarga almashtirib olish uchun bir necha yil vaqt bor edi. Qonun 2013-yili qabul qilingan va 2014-yil 1-iyundan kuchga kirishi lozim edi, biroq so‘nggi lahzada uning kuchga kirishi sanasi 2015-yil 1-iyuniga qadar uzaytirilgan edi. 2015-yilning aprelida esa muddat yana ko‘chirildi — bu safar 2017 yilga. Vyacheslav Lisakovning tushuntirishicha, qonunning kuchga kirishi sanasi Qrimning qo‘shib olinishi munosabati bilan kechiktirilgan — yarimorol aholisi o‘sha vaqtda faqat Ukraina namunasidagi haydovchilik guvohnomalariga ega bo‘lgan.
Taksi saroylarining boshqaruvchilari qonunning kuchga kirishi bilan Rossiyada noqonuniy kirakashlar soni ko‘payishini taxmin qilmoqda. “Haydovchilar baribir non topib yeyishni istaydi. Oqibatda noqonuniy kirakashlar, taksiga hech qanday aloqasi yo‘q — ne brendi bo‘lgan, na tibbiy va texnik ko‘rikdan o‘tgan haydovchilar paydo bo‘ladi. Bunday mashina manzilga bexavotir yetib boradi, degan ishonch endi mijozda bo‘lmaydi. Biz 1990-yillarga qaytyapmiz”, — deya xavotirlarini bildirdi “Blagost” taksi parki vakili Artyom Ponyatov.
Izoh (0)