Porsche Лейпцигдаги (Германия) ўзига тегишли ҳудудда ҳар бирида тахминан 60 минг асалари яшайдиган 25 та колонияни жойлаштирди. Шу тариқа компания 1,5 миллион ҳашаротга бошпана берди, дея ҳикоя қилади «Мотор».
Асалари хўжалиги Porsche синов трассаси ҳудудида жойлашган. Комплекс жами 132 гектар майдонни эгаллаган бўлиб, бундан 40 гектари хўжалик учун ажратиб берилди.
Porsche мутасаддиларига кўра, компания Германияда асаларилар сони кескин камайиб кетгани учун шундай қарорга келган: мамлакатда асалари колониялари сони 1952 йилдаги 2,5 миллиондан ҳозирда бир миллионга ҳам етмаган даражага тушиб қолган.
Битта асалари колонияси ҳар йили 55 килограмм асал бериши мумкин. Демак, ҳашаротлар компанияга йилига 1375 килограмм маҳсулот етказиб беради. Асалдан Porsche’нинг ошхоналарида фойдаланилади, шунингдек, компаниянинг Лейпцигдаги мижозлар марказида сотилади.
Қайд этиш жоизки, Porsche’нинг Лейпцигдаги ҳудудида 75 та зубр ва 27 та от ҳам истиқомат қилади.
Изоҳ (0)