Россияда 1 июндан такси, автобус, «маршрутка» ва юк машиналари ҳайдовчиларининг хорижий ҳайдовчилик гувоҳномалари билан ишлашини тақиқловчи қонун кучга кирди. Қонун 2013 йилдаёқ қабул қилинган, бироқ унинг кучга кириши мунтазам кечиктириб келинаётган эди. Шунга қарамай, Россияда меҳнат қилаётган минглаб ҳайдовчиларга ушбу қонун таъсир кўрсатди ва мамлакатнинг йирик шаҳарларида вақтинчалик такси етишмовчилиги юзага келди, деб ёзади Meduza.
1 июндан кучга кирган қонун чет элликларга, агар уларда Россияда берилган ҳайдовчилик гувоҳномалари бўлмаса, ҳайдовчи бўлиб ишлашни тақиқлайди. Россия Давлат думаси томонидан қабул қилинган ва президент Владимир Путин томонидан имзоланган қонунда ҳайдовчилик гувоҳномасини Россияда олмаган шахсларга «транспорт воситаларини бошқариш билан бевосита боғлиқ тадбиркорлик ва меҳнат фаолиятини амалга ошириш вақтида транспорт воситасини бошқариш» тақиқланиши ёзиб қўйилган. Шундай қилиб, мазкур қонун Россияда такси, «маршрутка» ёки бошқа жамоат транспорти ҳайдовчиси бўлиб ишлаётган минглаб чет элликларни ишсиз қолдирди.
Агар уларнинг бари ишини давом эттиришни истаса, ҳайдовчилик гувоҳномаси учун қайтадан имтиҳон топшириши керак бўлади — битта назарий имтиҳон ва иккита амалий (бири автодромда, иккинчиси эса шаҳар бўйлаб ҳаракат шароитида). Россияники бўлмаган ҳайдовчилик гувоҳномаси билан автомобилни бошқариш учун жарима миқдори 5 мингдан 15 минг рублгача етади. Чет эллик ҳайдовчига иш берувчи эса 50 минг рублгача жаримага тортилиши мумкин.
Россиялик депутатлар қонуннинг жорий этилишини халқаро нормаларга, хусусан, Йўл ҳаракати тўғрисидаги Вена конвенцияси талабларига мувофиқ келиш зарурати билан оқлаган. Депутатлар ушбу қонун конвенциянинг айнан қайси бандига мувофиқ келишга ёрдам беришини маълум қилмади — Вена келишувида хорижий ҳайдовчилик гувоҳномаси билан такси ҳайдаб бўлмаслиги ҳақида бирор гап йўқ.
1 ва 2 июнь кунлари бутун Россия бўйлаб ўн минглаб ҳайдовчилар ишга чиқмади. Давлат думасининг қонунчилик масалалари бўйича қўмитаси раиси биринчи ўринбосари ва автомобилчиларнинг «Танлов эркинлиги» жамоатчилик ташкилоти раиси Вячеслав Лисаковнинг маълум қилишича, «ўн минглаб» ҳайдовчилар Россияда ишлаш ҳуқуқидан маҳрум бўлган. «Единая Россия» фракцияси аъзоси ва Давлат думасининг транспорт масалалари бўйича қўмитаси раҳбари Евгений Москвичевнинг маълум қилишича, Россияда ёлланиб ишлаётган 120 минг ҳайдовчидан камида 70 минг нафарида Россия намунасидаги ҳайдовчилик гувоҳномалари йўқ. «Сенсация бўлмайди, транспорт соҳаси тўхтаб қолмайди. Ишлашни истаганлар, ҳайдовчилик гувоҳномасини алмаштиради, қолганлар эса қайтиб кетади», — деди Москва автомактаблар иттифоқи раиси Александр Ачкасов.
Москва Савдо-саноат палатаси маълумотларига кўра, Москва шаҳрида 1 июндан бери 20 фоиз ҳайдовчи ишга чиқмаяпти. Москвадаги йирик такси паркларидан бири — Nexi’нинг бошқарувчи директори Олег Кострубиннинг тасдиқлашича, 1 июндан бошлаб автокорхонанинг 25 фоиз ҳайдовчиси — асосан Беларусь ва Ўрта Осиё республикалари фуқаролари ишга чиқа олмаяпти. Санкт-Петербургдаги «Благость» такси хизмати бошқарувчиси Артём Понятов таксопарк ҳайдовчиларининг учдан бири — Россия намунасидаги ҳайдовчилик гувоҳномасига эга бўлмаган хорижийлардир.
Россиянинг бошқа ҳудудларидаги такси парклари ҳам шундай муаммоларга дуч келган. Калининград вилоятида эса иш маҳаллий ДАН раҳбарияти «масала якуний ҳал этилмагунига қадар» Россия намунасидаги ҳайдовчилик гувоҳномаси бўлмаган ҳайдовчиларни ишга олган иш берувчиларни жавобгарликка тортмасликка ваъда беришигача бориб етган.
Расман чет эллик ҳайдовчиларда ўз гувоҳномаларини Россия намунасидаги ҳужжатларга алмаштириб олиш учун бир неча йил вақт бор эди. Қонун 2013 йили қабул қилинган ва 2014 йил 1 июндан кучга кириши лозим эди, бироқ сўнгги лаҳзада унинг кучга кириши санаси 2015 йил 1 июнига қадар узайтирилган эди. 2015 йилнинг апрелида эса муддат яна кўчирилди — бу сафар 2017 йилга. Вячеслав Лисаковнинг тушунтиришича, қонуннинг кучга кириши санаси Қримнинг қўшиб олиниши муносабати билан кечиктирилган — яриморол аҳолиси ўша вақтда фақат Украина намунасидаги ҳайдовчилик гувоҳномаларига эга бўлган.
Такси саройларининг бошқарувчилари қонуннинг кучга кириши билан Россияда ноқонуний киракашлар сони кўпайишини тахмин қилмоқда. «Ҳайдовчилар барибир нон топиб ейишни истайди. Оқибатда ноқонуний киракашлар, таксига ҳеч қандай алоқаси йўқ — не бренди бўлган, на тиббий ва техник кўрикдан ўтган ҳайдовчилар пайдо бўлади. Бундай машина манзилга бехавотир етиб боради, деган ишонч энди мижозда бўлмайди. Биз 1990-йилларга қайтяпмиз», — дея хавотирларини билдирди «Благость» такси парки вакили Артём Понятов.
Изоҳ (0)