Миллий матбуот марказида миллий кинематография санъатини янада ривожлантириш борасида амалга оширилаётган ишлар ва истиқболдаги режаларга бағишланган матбуот анжумани бўлиб ўтди. Бу ҳақда ЎзА хабар берди.
«Ўзбеккино» миллий агентлиги бош директори Отабек Мусаев кинематография соҳасини изчил ривожлантириш, унинг халқ ҳаёти, айниқса, навқирон авлод тарбиясидаги ўрни ва таъсирини янада кучайтиришга алоҳида эътибор қаратилаётганини таъкидлади.
2017 йилнинг ўтган даври мобайнида давлат буюртмаси асосида 4 та бадиий, шунча мультипликацион, «Зумраша» болалар юмористик киножурналининг биринчи ва иккинчи сони, 17 та ҳужжатли ва илмий-оммабоп фильмларни суратга олиш ишлари бошланган.
Ўтган йили давлат буюртмасига асосан ишлаб чиқарилган «Хазонрезги» бадиий фильми Россия киноакадемиясининг «Ника» мукофотига МДҲ ва Болтиқбўйи давлатларининг энг яхши бадиий фильми номинацияси бўйича номзод бълди.
Жорий йилда ёш киноижодкорлар томонидан суратга олинган қисқа метражли фильмлар III Республика фестивали — RROLogue ўтказилади. Фестивальда 35 ёшгача бўлган киноижодкорлар сўнгги икки йил мобайнида суратга олган қисқа метражли бадиий фильмлари билан қатнашади.
Словакия, Эстония, Жанубий Корея, Буюк Британия, Греция, Россия каби давлатларда ўзбек киноси кунларини ўтказиш бўйича ташкилий ишлар олиб борилмоқда.
Изоҳ (0)