“AiF” 30 yil avval Litvada tug‘ilgan Siam egizaklarining bugungi taqdiri haqida maqola tayyorladi.
Egizak opa-singillar Viliya va Vitaliya 1987-yilda Litvaning Alitus shahrida tug‘ilgan. Ona tug‘uruqqacha ultratovushli tekshiruvdan o‘tmagani uchun, kraniopag — bir-biriga boshlari bilan qo‘shilib ketgan Siam egizaklarini dunyoga keltirishi haqida bilmagan.
1989-yil yozida Moskvadagi Burdenko nomli ilmiy-tadqiqot institutida Siam egizaklarini ajratish bo‘yicha operatsiya bo‘lib o‘tdi, u qariyb bir kecha-kunduz davom etdi. Professor (bugungi kunda Rossiya Fanlar akademiyasi akademigi) Aleksandr Konovalov qizlarga haqiqiy hayot hadya etdi. Noyob operatsiya tufayli Konovalovning nomi Ginnessning Rekordlar kitobiga kiritildi.
Moskvadagi operatsiyadan so‘ng, opa-singillarning bosh suyagini yopish, uni rekonstruksiya qilish, plastik operatsiya kabi 20 ga yaqin jarrohlik aralashuvlari talab etildi.
Bugungi kunda egizaklarning ota-onasi va ukasi hamon Alitusda yashaydi. Qizlar esa o‘qish uchun Vilnyusga kelib, shu yerda qolishdi. Vitaliya san’at tarixi bo‘yicha mutaxassis, Viliya tarix o‘qituvchisi bo‘lib yetishdi. Ular boshqa ko‘plab qizlar kabi orzusidagi yigitni uchratib, oila qurish umidi bilan yashamoqda. Opa-singillar bugungi kunda sog‘lom, quvnoq va maftunkor qizlardir. Ular oddiy odamlardek yashab, ishlaydi, shaharda sayr qiladi, sayohatga chiqadi, do‘stlari bilan uchrashadi, kino va teatrga boradi.
Izoh (0)