Buxoro shahridagi markaziy ko‘chalar birlashtirilib, ularga Islom Karimov nomi berildi

Xalq deputatlari Buxoro viloyat Kengashining 10-may kuni bo‘lib o‘tgan sessiyasida O‘zbekiston Birinchi Prezidenti Islom Karimovning xotirasini abadiylashtirish maqsadida Buxoro shahridagi markaziy ko‘chalarni birlashtirib, Islom Karimov nomini berish to‘g‘risidagi masala muhokama qilindi.

Viloyat hokimligi axborot xizmatidan ma’lum qilishlaricha, viloyat deputatlari Buxoro shahar kengashi deputatlarining 9-fevraldagi qarori bilan tasdiqlangan Buxoro shahridagi Abduxoliq G‘ijduvoniy ko‘chasi hamda O‘zbekiston Mustaqilligi ko‘chasining Piridasgir ko‘chasi bilan kesishmasigacha bo‘lgan hudud nomini Islom Karimov ko‘chasi deb o‘zgartirish to‘g‘risidagi taklifni bir ovozdan ma’qulladi.

Viloyat kengashi raisi, viloyat hokimi O‘ktam Barnoyev Islom Karimov nomi bilan ataladigan ko‘cha qiyofasi butkul yangilanib, uning atrofida zamonaviy turar joylar, Universal sport majmuasi va boshqa ko‘rkam binolar barpo qilinishini qayd etdi.