Халқ депутатлари Бухоро вилоят Кенгашининг 10 май куни бўлиб ўтган сессиясида Ўзбекистон Биринчи Президенти Ислом Каримовнинг хотирасини абадийлаштириш мақсадида Бухоро шаҳридаги марказий кўчаларни бирлаштириб, Ислом Каримов номини бериш тўғрисидаги масала муҳокама қилинди.
Вилоят ҳокимлиги ахборот хизматидан маълум қилишларича, вилоят депутатлари Бухоро шаҳар кенгаши депутатларининг 9 февралдаги қарори билан тасдиқланган Бухоро шаҳридаги Абдухолиқ Ғиждувоний кўчаси ҳамда Ўзбекистон Мустақиллиги кўчасининг Пиридасгир кўчаси билан кесишмасигача бўлган ҳудуд номини Ислом Каримов кўчаси деб ўзгартириш тўғрисидаги таклифни бир овоздан маъқуллади.
Вилоят кенгаши раиси, вилоят ҳокими Ўктам Барноев Ислом Каримов номи билан аталадиган кўча қиёфаси буткул янгиланиб, унинг атрофида замонавий турар жойлар, Универсал спорт мажмуаси ва бошқа кўркам бинолар барпо қилинишини қайд этди.
Изоҳ (0)