Bugun, 10-may kuni Qozog‘iston Parlamenti Majilisining yalpi majlisida deputatlar Qozog‘iston va O‘zbekiston o‘rtasidagi Qozog‘iston-O‘zbekiston davlat chegarasi orqali o‘tkazish punktlari to‘g‘risidagi hukumatlararo kelishuvga kiritiladigan tuzatishlar haqidagi ratifikatsiya aktini ko‘rib chiqadi. Bu haqda “1news.uz” xabar berdi.
Avvalroq O‘zbekiston-Qozog‘iston davlat chegarasidagi “Oq oltin” va “Malik” avtoyo‘l o‘tkazish punktlari 15-maydan ish boshlashi, bu O‘zbekiston Prezidentining 26-apreldagi qarorida ko‘zda tutilgani xabar berilgan edi.
Toshkent va Samarqandni qisqa yo‘l orqali bog‘lovchi M-39 trassasida joylashgan ushbu o‘tkazish punktlari faqat yengil avtotransport o‘tishi uchun foydalaniladi. Tijorat maqsadida yuk va tovarlarni ushbu punktlar orqali olib o‘tish taqiqlangan.
M-39 avtomobil yo‘li 2006-yilda yopilgan edi. Yo‘l ochilgach, Toshkentdan Samarqandga Jizzax orqali aylanma yo‘ldan yurib o‘tirmasdan, qisqa yo‘l bilan borish mumkin bo‘ladi, shunda masofa 89 dan 24,5 kilometrgacha qisqaradi.
Izoh (0)