Uzreport professional boksning super-og‘ir vaznidagi sportchilari — Vladimir Klichko va Entoni Joshua o‘rtasidagi chempionlik jangini bugun — 30-aprelga o‘tar kechasi tungi 1:40 dan boshlab namoyish etadi.
Bugungi boks kechasini UzReport telekanalida Davran Fayziyev sharhlab boradi. U o‘zining Facebook sahifasida mazkur jang oldidan quyidagi faktlarni yozib qoldirdi.
- Vladimir Klichko va Entoni Joshua 16 yillik farq bilan Olimpiada chempionligini qo‘lga kiritgan. 1996-yilda Vladimir, 2012-yili o‘z uyida Entoni.
- Joshua Olimpiadani yutganida Klichko profringda 50 dan ortiq jang o‘tkazib bo‘lgandi.
- Klichko Olimpiada chempioni bo‘lganida Joshua 6 yoshda edi.
- Entoni Joshua — professional ringda 18 jang, 18 g‘alaba va 18 nokaut.
- Joshuaga qarshi chiqqan raqiblardan hech kim yettinchi raundan nariga o‘ta olmagan.
- Klichko boksning superog‘ir vaznida eng uzoq vaqt davomida chempion bo‘lgan bokschilardan biri hisoblanadi.
- Raqiblari bo‘yida farq yo‘q. Entoni qo‘llarining uzunligi bo‘yicha ustun. Bu esa Klichkoga qarshi chiqadigan bokschilarda kam uchraydigan holat.
- Ikki yil oldin Joshua Klichko ishtirok etgan mashg‘ulotda sparing sherik rolini o‘ynagandi. O‘shanda Vladimir yosh bokschining ulkan potensiali va kuchiga tan berib, uni og‘ir vazn kelajagi deb aytgandi.
- Jangni “Uembli” stadionida 86.000 muxlis tomosha qiladi. Rekordga yaqin ko‘rsatkich.
- Bukmekerlik kompaniyalari tarixda ikkinchi bor boks oldidan Klichkoni favorit deb e’tirof etmayapti.
- Bu “tajriba” va “yoshlik” o‘rtasidagi klassik to‘qnashuv.
Tezkor Joshuada imkon dastlabki besh raundda bo‘ladi. Undan o‘tib ketsa, Klichko bir necha o‘n yil ichida yozgan boks kitoblari kutubxonasiga olib kirib, dars berib qo‘yadi.Davron Fayziyev, sharhlovchi