Forbes nashrining Rossiyadagi bo‘limi rossiyalik milliarder Alisher Usmonov misolida muqobil fuqarolik yoki boshqa mamlakatda istiqomat uchun berilgan guvohnomadan foydalanib, Rossiyada soliqlarni to‘lamaslikka hamda avtomatik moliyaviy axborot almashinuvi doirasida chet el banklaridagi hisobvaraqlari to‘g‘risidagi ma’lumotlar uzatilmasligiga qanday erishish mumkinligini tushuntirib berdi.
2016-yilda Rossiya vakolatli soliq organlari o‘rtasidagi hamkorlik to‘g‘risida ko‘p tomonlama bitimni imzoladi. Shu tariqa, Rossiya jismoniy shaxslar va tashkilotlarning moliyaviy hisoblari to‘g‘risidagi axborotni avtomatik tarzda ayirboshlash jarayoniga qo‘shilishga rozi bo‘ldi.
Moliyaviy axborotni ayirboshlash bank yoki boshqa moliyaviy institut mijozining fuqaroligiga emas, soliq rezidentligiga asoslanadi. Ikkinchi fuqarolik yoki istiqomat uchun guvohnoma olish orzuingizdagi mamlakatga doimiy yashash uchun borish imkonini beradi, ammo siz shunga qaramay Rossiyada yashab qolsangiz, soliq nuqtai nazaridan hech narsa o‘zgarmaydi. Siz hisoblaringizni ochgan Shveysariya yoki Angliya banklari ular haqida Rossiyaga axborot uzatmasligi uchun, siz soliq rezidentligini o‘zgartirishingiz va bu faktni bankirlarga hujjatlar bilan isbotlashingiz kerak.
Rossiyalik milliarder Alisher Usmonov 2016-yilda Shveysariyaning 300 nafar eng boy odamlari ro‘yxatiga kirgan edi. Bu Usmonov Shveysariyada istiqomat uchun guvohnomaga ega va uning soliq rezidenti ekanligini bildiradi. Bir vaqtning o‘zida u Rossiyaning soliq rezidenti hamdir. Bu mumkinmi? Albatta mumkin va na Rossiya, na Shveysariya qonunchiligiga zid keladi. Agar Alisher Usmonov o‘z soliq yukini kamaytirmoqchi bo‘lsa, u Rossiya va Shveysariya o‘rtasidagi ikki marta soliqqa tortilish to‘g‘risidagi bitimning qoidalaridan foydalanishi mumkin, shunda u Rossiyada to‘lagan soliqlarning bir qismi Shveysariyada hisobga olinadi va aksincha. Yoki Alisher Usmonov ikkala mamlakatda ham soliqlarni to‘liq hajmda to‘lashi mumkin — bu qarorni soliq to‘lovchi sifatida uning o‘zi qabul qiladi.
Izoh (0)