“She’riyatga oshno bo‘lgan inson aslo kam bo‘lmaydi”. Shavkat Mirziyoyev Shoirlar xiyobonida adiblar bilan uchrashdi

O‘zbekiston Prezidenti Shavkat Mirziyoyev Alisher Navoiy nomidagi O‘zbekiston Milliy bog‘idagi Shoirlar xiyobonida bir guruh adiblar bilan uchrashdi, deya xabar bermoqda O‘zA.

Uchrashuvda bu maskanni yanada obod qilish, odamlarning, ayniqsa, yoshlarning ma’naviyatini yuksaltirish, ularni kitobga oshno qilish, o‘zbekistonlik mashhur adiblar hayoti va ijodi bilan yaqindan tanishtirish maqsadida ularni bu dargohga muntazam ravishda jalb etish haqida so‘z bordi.

“Birinchi Prezidentimiz ta’kidlaganidek, Alisher Navoiy asarlari o‘zbek adabiy tili va milliy adabiyotimiz rivojining asosini belgilab beribgina qolmay, xalqimiz ma’naviy olamining shakllanishida ham muhim ahamiyat kasb etadi. Hazrat Navoiy merosini o‘rganish har bir insonni ilhomlantirib, aqlini teran, fikrini tiniqlashtiradi, tafakkurini yuksaltiradi”, — deyiladi O‘zA axborotida.

O‘zbekistondagi barcha madaniy muassasalarda she’rxonlik kechalari o‘tkazish, yoshlarning bunday uchrashuvlarda faol ishtirokini ta’minlash maqsadga muvofiq ekanligi qayd etildi.

Shoirlar xiyoboni shunday maskan bo‘lishi kerakki, shoirlarimizning she’rlari bu yerda muntazam jaranglab turishi zarur... She’riyatga oshno bo‘lgan inson aslo kam bo‘lmaydi.

Shavkat Mirziyoyev, O‘zbekiston Prezidenti

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.