OPEK tomonidan yanvar oyida neft qazib olish hajmi 1 million barreldan ko‘proqqa kamaydi. Shu tariqa OPEK va kartelga a’zo bo‘lmagan neft eksport qiluvchi mamlakatlarning Venadagi kelishuv shartlari 82 foizga bajarildi. Bu haqda “Vestnik Kavkaza” xabar bermoqda.
Bloomberg ma’lumotlariga ko‘ra, Avstriya poytaxtida xomashyo qazib olish hajmini sutkasiga 1,8 million barrelga kamaytirish to‘g‘risidagi kelishuvni imzolagan kartelning 10 a’zosi kelishilgan hajmlarning 83 foizini qisqartirdi. Biroq Eron, Nigeriya va Liviyada qazib olish ko‘paygani tufayli ularning urinishlari kutilgan samarani bermadi.
Mazkur davlatlar va kartelda a’zoligini to‘xtatgan Indoneziya hisobiga OPEK qazib olish hajmi kelishuvdagidan kuniga 550 ming barrelga ko‘p bo‘ldi. Bu esa xomashyo ortiqchaligini bartaraf etish va narxlarni ko‘tarishga qaratilgan rejaning hozircha 60 foizga bajarilganini ko‘rsatadi.
OPEKning kelishuv shartlari bajarilishini kuzatib borayotgan qo‘mitasi raisi bo‘lgan Kuvayt neft sanoati vaziriga ko‘ra, kartel rejalashtirilgan qisqartirishlar 100 foiz bajarilishiga umid bildirmoqda. 2008-yilda OPEKning shunday kelishuvi ijrosi 70 foizli ko‘rsatkichda qolib ketgandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)