Professional boksga o‘tish ilinjida bo‘lgan Fazliddin G‘oibnazarov AQShda promouterlik kompaniyalari bilan muzokara olib bormoqda

Uzbek Tigers tarkibiga kiritilmay, ko‘pchilikni ajablantirgan Rio—2016 o‘yinlari chempioni Fazliddin G‘oibnazarov AQShda bo‘lib turibdi. Bu haqda “Olamsport” ma’lum qildi.

Nashrning qayd etishicha, Fazliddin G‘oibnazarov faoliyatini professional boksda davom ettirish harakatiga tushgan. Unga AQShning bir qator promouterlik kompaniyalari taklif bilan chiqqani uchun, o‘zbekistonlik charm qo‘lqop ustasi okean ortiga jo‘nab ketgan va bildirilgan takliflarni o‘rganib chiqmoqda. Shu boisdan ham u Uzbek Tigers safida shug‘ullanmayapti.

Rio—2016 Olimpiadasida O‘zbekiston delegatsiyasi uchun to‘rtinchi oltin medalni taqdim etgan Fazliddin G‘oibnazarov mamlakat boks termasini olimpiya o‘yinlari yakuniga ko‘ra umumjamoa hisobida peshqadam bo‘lishini ta’minlagandi. Bu esa bokschining “O‘zbekiston iftixori” faxriy unvoni bilan taqdirlanishiga sabab bo‘lgandi.