Qishki transfer bozori Yevropada 1-fevral sanasi kirib kelishi bilan yakuniga yetadi. Shu vaqt ichida bir qator klublar o‘z safini kuchaytirib olishga harakat qiladi.
Alvaro Morata
Ispaniyalik hujumchiga “Real”dagi maqomi yoqmayapti. “Yuventus”dan qaytib kelganidan buyon Zinedin Zidan unga Karim Benzemaning o‘rinbosari sifatida qaraydi. Morata esa boshlang‘ich tarkibning birinchi raqamli hujumchisi bo‘lishni istaydi.
“Real” prezidenti Flarentino Peres Alvaroning kayfiyatini tushundi va unga o‘z narxini ma’lum qildi: “Agar biz 60 million olsak, sen ertagayoq ketishing mumkin”.
“Sports.ru”ning The Telegraph nashriga asoslanib ma’lumot berishicha, “Arsenal” Morata borasida muzokara o‘tkazishga tayyor.
Antuan Grizmann
Milanning “Inter” klubi mavsum yakunida Fransiya terma jamoasi va Madridning “Atletiko” klubi hujumchisi Antuan Grizmanni sotib olishga qaror qildi. Bunga futbolchining o‘zi va “Atletiko” qanday munosabat bildirishi aniq emas.
Madrid klubi “Inter” taklif qilayotgan summaga katta ehtimol bilan yo‘q deya olmaydi. Moliyaviy muammolarini hal qilgani aytilayotgan Milan klubi Grizmann uchun 125 million yevro to‘lashga tayyor. Qayd etish kerak, transfer bozorida “Manchester Yunayted”ning Pogbaga 105 million atagani rekord ko‘rsatkich bo‘lib turibdi.
Qiziq tomoni, “Yunayted” Grizmanni ham o‘z safiga chorlamoqda. Fransiyalik hujumchi bu borada Joze Mourinyo boshchilik qilayotgan klub bilan og‘zaki kelishuvga erishgani aytilgan.
Branislav Ivanovich
“Chelsi” sharafini bir necha mavsumdan buyon himoya qilib kelayotgan Branislav Ivanovichning shartnomasi yarim yildan keyin o‘z yakuniga yetadi. London klubi futbolchiga yangi shartnoma taklif qilmadi. Rossiyalik milliarder Roman Abramovich egalik qiladigan jamoa agar Ivanovich Sankt-Peterburgning “Zenit” klubiga o‘tsa, uni tekinga qo‘yib yubormoqchi.
Vaholanki, Branislavning xizmati bilan Premyer-liganing “Everton”, “Lester”, “Vest Hem” kabi klublari ham qiziqmoqda. Biroq “Zenit” taklif qilayotgan summa Ivanovichga mosroq.
Londonda haftasiga 90 ming funt ishlab topayotgan himoyachi “Zenit”ning 3,5 yillik shartnomasi qo‘l qo‘yishi va yiliga 5 million yevro maosh olishi mumkin. 32 yoshni qarshi olgan futbolchiga 3,5 yillik shartnoma va 5 millinlik maoshni boshqa klublar katta ehtimol bilan bermaydi. O‘zbekistonda to‘p suradigan legioner futbolchilar ta’biri bilan aytganda Branislav Ivanovich ham bola-chaqasini boqish haqida o‘ylashi kerak.
Izoh (0)