“Buxoro” Ulug‘bek Baqoyevni bosh murabbiy qila olmaydi — unda Pro litsenziyasi yo‘q, Vadim Abramovda esa bor

So‘nggi ikki kun “Buxoro” futbol klubi atrofidagi voqealarga boy bo‘ldi. Viloyat hokimiyatidagi yig‘ilishda jamoani kuchli to‘rtlikka olib kirgan ikki mutaxassis kutilmaganda iste’foga chiqarildi.

Shundan keyin “Championat.asia” sayti “Buxoro” klubi bosh murabbiyi etib Vadim Abramov tayinlangani haqida xabar berdi. Oradan ko‘p o‘tmay, PFL matbuot xizmati Abramovning bosh murabbiy bo‘lgani asossiz ekani haqida bong urdi. “Buxoro” klubi rasmiy sayti Vadim Abramovni bosh murabbiy emas, maslahatchi sifatida tanishtirdi va bosh murabbiy kursisini Ulug‘bek Baqoyev egallagani haqida ma’lum qildi.

PFLning 2017-yilgi mavsum uchun qur’a tashlash marosimida so‘zga chiqqan tashkilot bosh direktori Farhod Magomedov bundan buyon Oliy ligada Pro litsenziyasiga ega bo‘lmagan mutaxassislar bosh murabbiy bo‘lmasligini ta’kidlagandi. “Championat.asia” nashrining xabar berishicha, Ulug‘bek Baqoyev “A” litsenziyasiga ega, biroq unda Pro litsenziyasi yo‘q.

Bundan kelib chiqadiki, “Buxoro” futbol klubi PFL talablarini chetga surgan va jamoaga so‘ralgan litsenziyasi yo‘q mutaxassisni boshchi qilgan. Maslahatchi murabbiy Vadim Abramovda esa Pro litsenziyasi bor. Shundan kelib chiqib, Vadim Karlenovich “Buxoro” bosh murabbiyi sifatida ro‘yhatdan o‘tkazilsa, u holda reglamentga ko‘ra matbuot anjumanlarida ham Ulug‘bek Baqoyev emas, Vadim Abramov ishtirok etishi kerak bo‘ladi.

PFL Ulug‘bek Baqoyevni bosh murabbiy sifatida ro‘yhatdan o‘tkazadimi yoki yo‘q — aniq ma’lumot berilmagan. Tashkilot “Buxoro” klubiga o‘z talabini eslatib o‘tadimi yoki reglamentga o‘zgartirish kiritadimi hozircha ma’lum emas.