Сўнгги икки кун «Бухоро» футбол клуби атрофидаги воқеаларга бой бўлди. Вилоят ҳокимиятидаги йиғилишда жамоани кучли тўртликка олиб кирган икки мутахассис кутилмаганда истеъфога чиқарилди.
Шундан кейин «Championat.asia» сайти «Бухоро» клуби бош мураббийи этиб Вадим Абрамов тайинлангани ҳақида хабар берди. Орадан кўп ўтмай, ПФЛ матбуот хизмати Абрамовнинг бош мураббий бўлгани асоссиз экани ҳақида бонг урди. «Бухоро» клуби расмий сайти Вадим Абрамовни бош мураббий эмас, маслаҳатчи сифатида таништирди ва бош мураббий курсисини Улуғбек Бақоев эгаллагани ҳақида маълум қилди.
ПФЛнинг 2017 йилги мавсум учун қуръа ташлаш маросимида сўзга чиққан ташкилот бош директори Фарҳод Магомедов бундан буён Олий лигада Про лицензиясига эга бўлмаган мутахассислар бош мураббий бўлмаслигини таъкидлаганди. «Championat.asia» нашрининг хабар беришича, Улуғбек Бақоев «А» лицензиясига эга, бироқ унда Про лицензияси йўқ.
Бундан келиб чиқадики, «Бухоро» футбол клуби ПФЛ талабларини четга сурган ва жамоага сўралган лицензияси йўқ мутахассисни бошчи қилган. Маслаҳатчи мураббий Вадим Абрамовда эса Про лицензияси бор. Шундан келиб чиқиб, Вадим Карленович «Бухоро» бош мураббийи сифатида рўйҳатдан ўтказилса, у ҳолда регламентга кўра матбуот анжуманларида ҳам Улуғбек Бақоев эмас, Вадим Абрамов иштирок этиши керак бўлади.
ПФЛ Улуғбек Бақоевни бош мураббий сифатида рўйҳатдан ўтказадими ёки йўқ — аниқ маълумот берилмаган. Ташкилот «Бухоро» клубига ўз талабини эслатиб ўтадими ёки регламентга ўзгартириш киритадими ҳозирча маълум эмас.
Изоҳ (0)