Las-Vegasdan o‘zining Tesla Model S markali elektromobilida Red Rok Kanyon parki tomon yo‘l olgan tadbrikor Rayan Negri mashinasi kaliti uyida qolib ketganligi uchun Moxave sahrosida noqulay holatga tushib qoldi. Rayan mashinasini mobil dastur yordamida o‘t oldirib yo‘lga chiqdi. Yo‘lda to‘xtagach esa uyali aloqa signali yo‘qligi tufayli sayohatini davom ettira olmadi, deb xabar berdi TJournal.
Negrining Instagram sahifasida qoldirgan xabariga ko‘ra, u parkka tog‘ qiyaliklaridagi qorlarni suratga tushirish maqsadida yo‘l olgan. Munosib joyni topgach, bir nechta surat olish uchun mashinadan tushadi. Oradan ko‘p o‘tmay Negri uyali aloqa signali yo‘qligini bildi va endi Tesla’ni o‘t oldirib bo‘lmasligni ham tushundi.
Tadbirkorning rafiqasi Emi aloqa uchun signal mavjud joyni topib, do‘stlariga qo‘ng‘iroq qilish va mashinaning kalitini olib kelishni iltimos qilishi uchun 3 kilometrdan ortiq masofani piyoda bosib o‘tishga majbur bo‘ldi.
Emi Negrining Mashable’ga hikoya qilishicha, u mobil dasturning aloqa signalisiz ishlamasligidan xabardor bo‘lgan, biroq bu yodidan ko‘tarilib ketgan.
Tadbirkor o‘z aybi bilan noqulay vaziyatga tushib qolganligini aytib, Tesla ishlab chiqaruvchilariga eletromobillarni aloqa signali bo‘lmagan taqdirda ham maxsus parol yordamida o‘t oldirish imkoniyatini qo‘shish kerak, deb murojaat qildi.
Bo‘lib o‘tgan voqealardan so‘ng, Negri o‘zining Instagram sahifasiga tabiat qo‘ynida olingan bir nechta suratlarini joyladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)