“Manchester Yunayted” futbol klubi hujumchisi Zlatan Ibrahimovich Angliya Premyer-ligasida dekabr oyining eng yaxshi futbolchisi deb topildi. Bu haqda APL matbuot xizmatiga tayanib, “Chempionat” xabar berdi.
Ibrahimovich dekabr oyi davomida 5 ta gol urishga muvaffaq bo‘lgan va 3 ta golli uzatma bergan.
Men buyuk murabbiyga ega bo‘lgan buyuk klubda buyuk futbolchilar bilan to‘p suraman.Zlatan Ibrahimovich, “Manchester Yunayted” a’zosi
Zlatan Ibrahimovichning “Vest Bromvich” darvozasiga urgan goli oyning eng chiroyli muvaffaqiyatli zarbasi nomiga da’vogarlik qilgandi. Biroq eng chiroyli gol uchun topshiriladigan sovrinni Zlatanning jamoadoshi Genrix Mxitaryan yutib oldi.
“Chelsi” klubi ustozi Antonio Konte dekabr oyining eng yaxshi murabbiyi sifatida tan olindi. U avvalgi ikki oyda ham tengsiz bo‘lgandi. Shu tariqa italiyalik mutaxassis APLda ketma-ket uch oy davomida eng yaxshi bo‘lgan ilk mutaxassisga aylandi.
London klubi Konte boshqaruvida dekabr oyida 6 ta o‘yin o‘tkazdi va ularning barchasida zafar quchishga muvaffaq bo‘ldi: “Manchester Siti” (3:1), “Vest Bromvich” (1:0), “Sanderlend” (1:0), “Kristal Pelas” (1:0), “Bornmut” (3:0) va “Stok Siti” (4:2). Qayd etish kerak, “Chelsi” 20-turdan joy olgan London derbisida “Tottenhem”dan mag‘lub bo‘lib, ketma-ket 13 o‘yindan buyon davom etib kelayotgan g‘alabali seriyasiga yakun yasagandi.
Izoh (0)