Aleksandr Geynrix
Aleksandr Geynrix Qozog‘istonda qolishga qaror qildi. Butunlay emas, albatta.
“Ordabasi” klubi sharafini himoya qilayotgan O‘zbekiston milliy terma jamoasi hujumchisi jamoasi bilan Turkiyaga jo‘nab ketadi. U faoliyatini shu klub safida davom ettirishga qaror qilgan. Geynrix faoliyatining so‘nggi yillarini o‘tkazayotgani uchun ham, bu qaror nisbatan to‘g‘ridek ko‘rinadi.
Odil Ahmedov
Rossiyadan O‘zbekistonga, O‘zbekistondan Xitoyga yetib borgan Ahmedov, Xitoydan Qatarga uchib ketishga majbur bo‘lgandi. Dohada uning mashg‘ulotlarini rasmdagi mutaxassis kuzatib bordi.
Bu — Bora Milutinovich. Xitoy terma jamoasini jahon chempionatiga olib chiqqan va guruhda O‘zbekistonni qoldirib yuborgan murabbiy. Faoliyati davomida bir necha mamlakat bilan mundialga tashrif buyurgan baxtli mutaxassis, JCh—2022 o‘tib olguniga qadar Qatar futboli bilan ishlaydi. U “Shanxay SIPG” mashg‘ulotni kuzatish uchun kelgan.
Mana bu yigitlar esa Qatarda bo‘lib turgan “Bavariya” vakillari. Ular Odil Ahmedovni tanimasa kerak. Biroq Ahmedov Bundesligada to‘p surishni orzu qilgandi, biroq Xitoyga kelib qoldi. Na chora, vaqti bor uning oldinda.
Ha, aytgancha, “Championat.asia”ning TransferMarkt China otliq manbaning Twitter sahifasiga asoslanib aytishicha, “Shanxay SIPG” Rikardu Karvalyu bilan ham shartnoma imzolagan. O‘z vaqtida Madridning “Real” va Londonning “Chelsi” klublarida o‘ynagan 38 yoshli himoyachi faoliyatini Ahmedov bilan bir jamoada davom ettirar ekan.
Kim oladiyo, shuginaniyo
Jasur HasanovO‘zbekistonlik futbolchilarning 75 foizi yanvar oyida erkin qushga aylanishi haqida xabar berilgandi. Shunday qushlardan biri Jasur Hasanov.
O‘tgan mavsumni “Buxoro” klubi safida o‘tkazgan futbolchi sovchi kutish bilan band. O‘z raqamlarini “o‘lja” izlayotgan hammaga berib chiqqan. Birinchi yaxshi qo‘ng‘iroq uning kelgusi 1 yillik taqdirini hal qilishi mumkin.
Sanjar Shoahmedov
“Lokomotiv” o‘zining yetakchi futbolchisi Shoahmedov bilan bir to‘xtamga kela olmagan ko‘rinadi. O‘tgan yil ham bu borada qiyinchilik kuzatilib, Shoahmedov shartnomaga eng so‘nggi bo‘lib qo‘l qo‘ygandi. U “Lokomotiv” bilan Amirliklarda bo‘lib turibdi. Shunga qaramay, unga boshqa klublardan ham takliflar bor. Qaysi klublardan ekanigina aniq emas.
Xorij? Shoahmedov eplab ketishi mumkin. Biroq yaqindagina oila qurgan futbolchining oilasi bunga qanday munosabat bildirarkin?
“Lokomotiv”
Kot-d’Ivuardan bo‘lgan ikki futbolchini o‘z safiga qo‘shib olgan “Lokomotiv” Dubayga uchib ketdi. Yangilardan Diyor Turopov va Shuhrat Muhammadiyev ham safda. Avvalroq klub o‘sha yerlarda “Zenit” bilan o‘ynashi ma’lum qilingandi.“Bunyodkor”
Amirliklardan qo‘nim topgan “Bunyodkor”ning ilk raqibi mahallliy “Ash-Shaab” klubi bo‘ladi. Bu haqda jamoaning Twitter sahifasi ma’lumot qoldirgan. Qatarning “Al-Jaish” klubiga qarshi o‘yin uchun tayyorgarlik ko‘rayotgan “qaldirg‘ochlar” uchun bu kerakli o‘yin.Gana! Afrika millatlar kubogi uchun tayyorgarlik ko‘rayotgan Avram Grant jamoasi 10-yanvar kuni “qaldirg‘och” ovlaydi. 17-yanvar kuni ganaliklar Ugandaga qarshi rasmiy o‘yinda maydonga tushadi. O‘sha uchrashuvga ko‘tarinki kayfiyatda yetib borish uchun, qandaydir klub chiroyli, iloji bo‘lsa yirikroq hisobda mag‘lub etilishi kerak. Masalan, “Bunyodkor”.
Kelishuv o‘zbekistonlik futbol muxlislarini quvontirishi tabiiy. O‘zbekiston milliy terma jamoasi oddiy klublar bilan o‘ynaganida ta’bi xira tortadigan muxlislar, bizning klublar ham nomi chiqqan termalarga qarshi o‘ynashi mumkinligini hazm qilishga harakat qiladi.
Ma’lumot uchun, Gana termasi safida Asamoa Gyan, Emmanuel Agemang Badu, Andre Ayyu, Jonatan Mensa, Kristian Atsu, Vakaso Muborak, Jordan Ayyu kabi futbolchilar bor. Zo‘r-a?
Bu “Bunyodkor” istiqomat qilayotgan mehmona. Bu ham zo‘r, to‘g‘rimi?
Bu serbiyalik futbolchi Aleksandar Ignatovich. 1988-yil dunyoga kelgani aytilgan, hozirga kelib bo‘yi 192 santimetrga yetgan. Yana o‘sadi yoki yo‘q, aniqlik kiritilmagan.
Mazkur futbolchi “Bunyodkor”da ko‘rikdan o‘tadi. Serbiya yoshlari safida 2 ta o‘yin o‘tkazgani, bir vaqtlar Gollandiyaning “Feyenoord” klubiga ijaraga berilib, maydonga umuman tushmaganidan bo‘lak aytishga arzigulik ma’lumoti yo‘q.
“Bunyodkor” rahbari esa odatda bir yil o‘ynatib ko‘rib, keyin “legionerlar ishonchni oqlamadi”, deyishni xush ko‘radi. Futbolchi Sergey Lushchanning talablariga qanchalik mos kelishini yaqin orada bilib olish mumkin.
“Paxtakor”
O‘ziga raqobatchi bo‘lgan uch klub dunyo kezganida, “Paxtakor” bir chekkada qarab turadimi? O‘zbekiston chempionatida “kuchli” beshlikka kirish uchun ham Amirliklada yig‘in o‘tkazish talab etiladi.“Paxtakor” 15-yanvar kuni BAAga yo‘l oladi va 30-yanvarga qadar Toshkentda ko‘rinmaydi. Sharjada yashash Dubaydan arzonroqmidi, xullas shu variantda to‘xtalingan.
Odil Ahmedovni Xitoyga pullab yuborgan “Krasnodar” Toshkent klubiga qarshi maydonga tushishga rozi bo‘lgan. Jamoa matbuot xizmatining xabar qilishicha, “Paxtakor”ga qarshi o‘yin 25-yanvar kuni o‘tkaziladi.
Yana serbiyalik?
Albatta, “Paxtakor”ning shu mamlakat futbolchilariga ishqi bo‘lakcha. 10 santimetri kam 2 metrlik Mario Maslach Toshkentga yetib kelib, murabbiylar ko‘rigida bo‘lib turibdi. Yoqsa, olib qolinadi. Yoqmasa qo‘liga 2 ta non berib...
Maslach Serbiya yoshlar terma jamoasi safida 2011-yil o‘ynagan, 1990-yilda tug‘ilgan. Rasmidan jiddiy odamga o‘xshaydi, o‘yini haqida ma’lumot yo‘q. Mario ismli yaxshi futbolchilar bor. Masalan, Balotelli, Manjukich, Gomes... Maslach qanday bo‘lib chiqishini vaqtdan boshqa hech narsa ko‘rsatib bera olmaydi.
“Obod”
Uchta “akasidan” farqli o‘laroq, Rauf Inileyev boshchilik qilayotgan poytaxtning “Obod” klubi kamtargina bo‘lib Toshkentda yuribdi. Klub o‘zi uchun sparing raqib ham topgan.
Kuniga ikki mahal yugurib yurgan jamoa futbolchilari 10-yanvar kuni Qozog‘istonning “Maxtaaral” klubi bilan bellashadi. Qo‘shni respublikada shunday klub borligini endi bildik. Katta ehtimol bilan ular ham O‘zbekistonda “Obod” borligini yaqinda bilgan.
Izoh (0)