Александр Гейнрих
Александр Гейнрих Қозоғистонда қолишга қарор қилди. Бутунлай эмас, албатта.
«Ордабаси» клуби шарафини ҳимоя қилаётган Ўзбекистон миллий терма жамоаси ҳужумчиси жамоаси билан Туркияга жўнаб кетади. У фаолиятини шу клуб сафида давом эттиришга қарор қилган. Гейнрих фаолиятининг сўнгги йилларини ўтказаётгани учун ҳам, бу қарор нисбатан тўғридек кўринади.
Одил Аҳмедов
Россиядан Ўзбекистонга, Ўзбекистондан Хитойга етиб борган Аҳмедов, Хитойдан Қатарга учиб кетишга мажбур бўлганди. Доҳада унинг машғулотларини расмдаги мутахассис кузатиб борди.
Бу — Бора Милутинович. Хитой терма жамоасини жаҳон чемпионатига олиб чиққан ва гуруҳда Ўзбекистонни қолдириб юборган мураббий. Фаолияти давомида бир неча мамлакат билан мундиалга ташриф буюрган бахтли мутахассис, ЖЧ—2022 ўтиб олгунига қадар Қатар футболи билан ишлайди. У «Шанхай СИПГ» машғулотни кузатиш учун келган.
Мана бу йигитлар эса Қатарда бўлиб турган «Бавария» вакиллари. Улар Одил Аҳмедовни танимаса керак. Бироқ Аҳмедов Бундеслигада тўп суришни орзу қилганди, бироқ Хитойга келиб қолди. На чора, вақти бор унинг олдинда.
Ҳа, айтганча, «Championat.asia»нинг TransferMarkt China отлиқ манбанинг Twitter саҳифасига асосланиб айтишича, «Шанхай СИПГ» Рикарду Карвалю билан ҳам шартнома имзолаган. Ўз вақтида Мадриднинг «Реал» ва Лондоннинг «Челси» клубларида ўйнаган 38 ёшли ҳимоячи фаолиятини Аҳмедов билан бир жамоада давом эттирар экан.
Ким оладиё, шугинаниё
Жасур ҲасановЎзбекистонлик футболчиларнинг 75 фоизи январь ойида эркин қушга айланиши ҳақида хабар берилганди. Шундай қушлардан бири Жасур Ҳасанов.
Ўтган мавсумни «Бухоро» клуби сафида ўтказган футболчи совчи кутиш билан банд. Ўз рақамларини «ўлжа» излаётган ҳаммага бериб чиққан. Биринчи яхши қўнғироқ унинг келгуси 1 йиллик тақдирини ҳал қилиши мумкин.
Санжар Шоаҳмедов
«Локомотив» ўзининг етакчи футболчиси Шоаҳмедов билан бир тўхтамга кела олмаган кўринади. Ўтган йил ҳам бу борада қийинчилик кузатилиб, Шоаҳмедов шартномага энг сўнгги бўлиб қўл қўйганди. У «Локомотив» билан Амирликларда бўлиб турибди. Шунга қарамай, унга бошқа клублардан ҳам таклифлар бор. Қайси клублардан эканигина аниқ эмас.
Хориж? Шоаҳмедов эплаб кетиши мумкин. Бироқ яқиндагина оила қурган футболчининг оиласи бунга қандай муносабат билдираркин?
«Локомотив»
Кот-д’Ивуардан бўлган икки футболчини ўз сафига қўшиб олган «Локомотив» Дубайга учиб кетди. Янгилардан Диёр Туропов ва Шуҳрат Муҳаммадиев ҳам сафда. Аввалроқ клуб ўша ерларда «Зенит» билан ўйнаши маълум қилинганди.«Бунёдкор»
Амирликлардан қўним топган «Бунёдкор»нинг илк рақиби маҳалллий «Аш-Шааб» клуби бўлади. Бу ҳақда жамоанинг Twitter саҳифаси маълумот қолдирган. Қатарнинг «Ал-Жаиш» клубига қарши ўйин учун тайёргарлик кўраётган «қалдирғочлар» учун бу керакли ўйин.Гана! Африка миллатлар кубоги учун тайёргарлик кўраётган Аврам Грант жамоаси 10 январь куни «қалдирғоч» овлайди. 17 январь куни ганаликлар Угандага қарши расмий ўйинда майдонга тушади. Ўша учрашувга кўтаринки кайфиятда етиб бориш учун, қандайдир клуб чиройли, иложи бўлса йирикроқ ҳисобда мағлуб этилиши керак. Масалан, «Бунёдкор».
Келишув ўзбекистонлик футбол мухлисларини қувонтириши табиий. Ўзбекистон миллий терма жамоаси оддий клублар билан ўйнаганида таъби хира тортадиган мухлислар, бизнинг клублар ҳам номи чиққан термаларга қарши ўйнаши мумкинлигини ҳазм қилишга ҳаракат қилади.
Маълумот учун, Гана термаси сафида Асамоа Гян, Эммануэль Агеманг Баду, Андре Айю, Жонатан Менса, Кристиан Атсу Вакасо Муборак, Жордан Айю каби футболчилар бор. Зўр-а?
Бу «Бунёдкор» истиқомат қилаётган меҳмона. Бу ҳам зўр, тўғрими?
Бу сербиялик футболчи Александар Игнатович. 1988 йил дунёга келгани айтилган, ҳозирга келиб бўйи 192 сантиметрга етган. Яна ўсади ёки йўқ, аниқлик киритилмаган.
Мазкур футболчи «Бунёдкор»да кўрикдан ўтади. Сербия ёшлари сафида 2 та ўйин ўтказгани, бир вақтлар Голландиянинг «Фейеноорд» клубига ижарага берилиб, майдонга умуман тушмаганидан бўлак айтишга арзигулик маълумоти йўқ.
«Бунёдкор» раҳбари эса одатда бир йил ўйнатиб кўриб, кейин «легионерлар ишончни оқламади», дейишни хуш кўради. Футболчи Сергей Лушчаннинг талабларига қанчалик мос келишини яқин орада билиб олиш мумкин.
«Пахтакор»
Ўзига рақобатчи бўлган уч клуб дунё кезганида, «Пахтакор» бир чеккада қараб турадими? Ўзбекистон чемпионатида «кучли» бешликка кириш учун ҳам Амирликлада йиғин ўтказиш талаб этилади.«Пахтакор» 15 январь куни БААга йўл олади ва 30 январга қадар Тошкентда кўринмайди. Шаржада яшаш Дубайдан арзонроқмиди, хуллас шу вариантда тўхталинган.
Одил Аҳмедовни Хитойга пуллаб юборган «Краснодар» Тошкент клубига қарши майдонга тушишга рози бўлган. Жамоа матбуот хизматининг хабар қилишича, «Пахтакор»га қарши ўйин 25 январь куни ўтказилади.
Яна сербиялик?
Албатта, «Пахтакор»нинг шу мамлакат футболчиларига ишқи бўлакча. 10 сантиметри кам 2 метрлик Марио Маслач Тошкентга етиб келиб, мураббийлар кўригида бўлиб турибди. Ёқса, олиб қолинади. Ёқмаса қўлига 2 та нон бериб...
Маслач Сербия ёшлар терма жамоаси сафида 2011 йил ўйнаган, 1990 йилда туғилган. Расмидан жиддий одамга ўхшайди, ўйини ҳақида маълумот йўқ. Марио исмли яхши футболчилар бор. Масалан, Балотелли, Манжукич, Гомес... Маслач қандай бўлиб чиқишини вақтдан бошқа ҳеч нарса кўрсатиб бера олмайди.
«Обод»
Учта «акасидан» фарқли ўлароқ, Рауф Инилеев бошчилик қилаётган пойтахтнинг «Обод» клуби камтаргина бўлиб Тошкентда юрибди. Клуб ўзи учун спаринг рақиб ҳам топган.
Кунига икки маҳал югуриб юрган жамоа футболчилари 10 январь куни Қозоғистоннинг «Махтаарал» клуби билан беллашади. Қўшни республикада шундай клуб борлигини энди билдик. Катта эҳтимол билан улар ҳам Ўзбекистонда «Обод» борлигини яқинда билган.
Изоҳ (0)