Berlin markazida yuk mashinasining olomonga kelib urilishi oqibatida 12 kishi halok bo‘ldi. Bu haqda shahar politsiyasining Twitter’dagi sahifasida xabar berilgan.
“Braytshaydplatsda 12 kishi hayotdan ko‘z yumganini qayg‘u bilan ma’lum qilamiz. 48 kishi kasalxonalarga yotqizilgan, ulardan ayrimlari jiddiy jarohat oldi”, — deyiladi tvitda.
Hodisa 19-dekabr, dushanba kuni kechki payt ro‘y berdi. Rojdestvo yarmarkasiga kelganlar qatoriga yuk mashinasi borib urildi. Haydovchi yashirinishga urindi, biroq qo‘lga olindi. Kabinada bo‘lgan ikkinchi kishi halok bo‘ldi.
Norasmiy manbalarga ko‘ra, jinoyatni sodir etishda gumon qilinayotgan shaxs Afg‘oniston yoki Pokistonda tug‘ilib-o‘sgan. U avval ham uncha og‘ir bo‘lmagan jinoiy ishlar sodir etgani uchun huquq-tartibot idoralari nigohiga tushgani bildirilmoqda.
Yuk mashinasi Polshada o‘g‘irlangan bo‘lishi mumkin. Germaniya ichki ishlar vaziri Tomas de Mezyer yuz bergan hodisa terakt ekanligini ko‘rsatuvchi omillar ko‘p ekanligini ta’kidladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)