Vazirlar Mahkamasining 12-dekabrdagi qarori (pdf) bilan 2017—2019-yillarda Toshkent shahrining Mirzo Ulug‘bek tumanini kompleks rivojlantirish dasturi qabul qilindi, deb yozadi UZ24.
Hujjat sanoat va eksport salohiyatini yanada kengaytirish, mavjud resurslardan to‘liqroq va samarali foydalanish hamda muhandislik-kommunikatsiya va ishlab chiqarish infratuzilmasini jadal qurish, xizmatlar va servis sohasini rivojlantirish, aholining bandligi va daromadlarini oshirish asosida Toshkent shahrining Mirzo Ulug‘bek tumanini kompleks rivojlantirishni ta’minlash maqsadida qabul qilindi.
Xususan, kelasi yili Buyuk ipak yo‘li va Gulsanam ko‘chalari kesishmasida “Navro‘z” dehqon bozorini qurish rejalashtirilgan. Parkent, Asaka va Mustaqillik ko‘chalari bo‘ylab ko‘p xonadonli turar-joylar quriladi.
Shuningdek, 2017—2018-yillarda Lashkarbegi va Qori Niyoziy ko‘chalari kesishgan joyda besh qavatli ko‘p xonadonli uylar, Feruza massivida ikkita uy, 2017—2019-yillarda esa Muhammad Yusuf ko‘chasidagi ikki qavatli uylar o‘rniga ikki qavatli avtoturargohlari va savdo obyektlari bo‘lgan 30 ta uy qurish ko‘zda tutilgan.
Bundan tashqari, hujjatga muvofiq, tuman ko‘chalari va dahalar orasidagi yo‘llarni qurish va ta’mirlash rejalashtirilgan. 8 ta maktab, 4 ta bog‘cha va 6-sonli poliklinika kapital ta’mirdan chiqariladi.
Izoh (0)