Xitoylik harbiylar Amerika okeanografiya kemasiga tegishli avtonom suv osti qurilmasini qo‘lga oldi, deya xabar bermoqda “Interfaks”. Bu haqda CNN Pentagondagi manbasiga tayanib xabar berdi.
Hodisa 15-dekabr kuni Janubiy Xitoy dengizidagi xalqaro suvlarda “Boudich” tadqiqot kemasi ekipajining ko‘z o‘ngida sodir bo‘ldi. Okeanshunoslar Subik-Bey (Filippin) ko‘rfazidan taxminan 100 km masofada to‘xtagan va o‘zining ikkita suv osti dronini ko‘tarmoqchi bo‘lgan. Shu paytda AQSh kemasini bir necha kun davomida to‘xtovsiz ta’qib qilgan xitoyliklar suvga qayiq tushirib, qurilma yoniga suzib borgan va uni olib ketgan.
Narxi 150 ming dollarga baholanayotgan suv osti uchuvchisiz qurilmasi dengiz tubi xaritasini tuzishda qo‘llanilgan.
Ta’kidlanishicha, tadqiqot kemasi ekipaji fuqaro shaxslardan iborat bo‘lgan: kema AQShga tegishli bo‘lsa-da, undan dengiz tashuvlari qo‘mondonligi foydalangan.
AQSh mudofaa vazirligi hodisaga rasman izoh berganicha yo‘q.
Izoh (0)