Angliya Liga Kubogi. “Liverpul” va “Xall Siti” yarim finalga yo‘l oldi. Bugun “Yunayted” va “Arsenal” taqdiri hal bo‘ladi

Futbol bo‘yicha Angliya Liga Kubogi musobaqasida yarim finalga yo‘l olgan ikki jamoa nomiga oydinlik kiritildi.

Nimchorak finalda Londonning “Tottenhem” klubiga chiqish eshiklarini ko‘rsatib qo‘ygan “Liverpul” futbolchilari, bu safar “Lids”ga imkoniyat qoldirmadi — 2:0. Divok Origi hamda Ben Vudbern tomonidan urilgan gollar Yurgen Klopp jamoasini yarim finalga olib chiqdi.

Qayd etish kerak, “Lids” darvozasiga ikkinchi golni urgan uelslik Ben Vudbern 1999-yilda tavallud topgan bo‘lib, endigina 17 yoshga qadam qo‘ygan. Shu kuni Klopp asosan zaxira futbolchilari xizmatidan foydalandi.

Chorak finalning ikkinchi o‘yinida “Xall Siti” va “Nyukasl” to‘qnash keldi. Uchrashuvning asosiy vaqti 0:0 hisobidagi durang bilan yakunlandi. 98-daqiqada Rafael Benites boshchilik qilayotgan “Nyukasl” hisobda oldinga o‘tib olgan bo‘lsa, oradan bir daqiqa o‘tib muvozanat tiklandi. Penaltilar seriyasida omad “Xall” futbolchilariga kulib boqdi — 3:1.

Bugun — 30-noyabr kuni chorak finalning yana ikki uchrashuvi bo‘lib o‘tadi. Joze Mourinyo boshchilik qilayotgan “Manchester Yunayted” Londonning “Vest Hem” klubiga qarshi saf tortadi. Qayd etish kerak, mazkur jamoalarning Premyer-Liga so‘nggi turidagi o‘yinida 1:1 hisobi qayd etilgandi.

Chorak finalning so‘nggi juftligini “Arsenal” hamda “Sautgempton” tashkil qilgan.

Angliya Liga Kubogi Chorak final 29-noyabr, seshanba

“Liverpul” — “Lids” 2:0

“Xall Siti” — “Nyukasl” 1:1 pen — 3:1

30-noyabr, chorshanba“Manchester Yunayted” — “Vest Hem”“Arsenal” — “Sautgempton”