Rossiya Shveysariyadan mamlakat qiruvchilarining Il-96 samolyotiga yaqinlashgani yuzasidan izoh so‘radi

Rossiyaning Shveysariyadagi elchixonasi Tashqi ishlar federal departamentiga ushbu mamlakat qiruvchilari “Rossiya” maxsus parvoz otryadining Moskvadan Peruga yo‘l olgan Il-96 samolyotiga yaqin kelgani yuzasidan nota jo‘natdi. Bu haqda “TASS” xabar bermoqda.

“Qiruvchilarning Rossiya samolyotiga yaqinlashuvi munosabati bilan Shveysariya tashqi ishlar departamentiga taajjub bildirilgan va buni izohlash so‘ralgan nota yuborildi. Chunki parvozga ruxsat oldindan olingandi”, — ta’kidladi elchixona matbuot xizmati vakili.

“Rossiya” maxsus parvoz otryadining Peru poytaxti Limaga, Osiyo-Tinch okeani iqtisodiy hamkorligi sammitiga yo‘l olgan Il-96 samolyoti Shveysariya havo hududida ushbu davlat HHK qiruvchilari tomonidan kutib olingan va Fransiya chegarasigacha kuzatib borilgandi. Samolyot yo‘lovchilari orasida Rossiya prezidenti Vladimir Putinning delegatsiyasi a’zolari, ularga hamrohlik qiluvchi shaxslar va jurnalistlar bo‘lgan.