28—29-oktabr kunlari “Istiqlol” san’at saroyida xonanda Jahongir Otajonovning jonli ijrodagi “Kuz gullari” nomli konsert dasturi bo‘lib o‘tdi. Konsertda jurnalist Feruz Muhammad bo‘ldi va o‘z fikrlari bilan o‘rtoqlashdi.
Ba’zi jurnalistlarning “bir yilda bo‘layotgan ikkinchi konsertga muxlislar kelarmikan, bu noto‘g‘ri bo‘lsa kerak”, deya bildirgan xavotirlari o‘rinsiz bo‘lib chiqdi: “Istiqlol”ning zali ham, balkoni ham muxlislar bilan liq to‘ldi. Ular Jahongir Otajonovni sahnaga chiqqunicha, sahnaga chiqqandan keyin ham davomli qarsaklar bilan olqishlab turdi.
“Gunohim” deb nomlangan qo‘shiq yarim soat kech boshlangan dasturning ilk taronasi bo‘ldi. “Men sizga mushtoqman, siz menga mushtoqsiz” deb nomlangan qo‘shig‘ini kuylab, zal bo‘ylab “sayohatga” chiqqan Jahongir Otajonov zalning u burchagidan, to bu burchagiga qadar ham qo‘shiq aytib, ham raqsga yaqin harakatlar qilib, ham muxlislar bilan selfi tushib sahnaga qaytdi.
Sahnaga qaytgan xonanda muxlislarga qarata: “Zalning oxirida o‘tirgan muxlislar bilan ham ko‘rishib qaytmasam bo‘lmasdi. Agar qaysidir muxlisimizga sho‘xligim malol kelgan bo‘lsa, tartibsizligim uchun uzr so‘rayman”, deyishi bilan, bunga javoban muxlislar tomonidan gulduros qarsaklar va: “Unday emas, hammasi joyida”, degan hayqiriqlar eshitildi.
Dasturda to‘rtinchi bo‘lib yangragan “Istaysizmi yo‘qmi, sizni sevaman” nomli qo‘shiqdan so‘ng, nazarimda, tomoshabirnlarga ham, xonandaga ham “jon kirdi”. Xonanda bugungi kunda o‘zini qo‘shiqchi sifatida e’tirof qilayotgan qo‘shtirnoq ichidagi qo‘shiqchilarga “Qo‘shiqchi” qo‘shig‘i orqali tanqidiy munosabat bildirdi.
“Qo‘shiqchi” qo‘shig‘iga “Ilhom” teatr-studiyasining aktyor va aktrisasidan iborat juftlik tomonidan ajoyib sahna ko‘rinishi tayyorlangan. Ular qo‘shiq so‘ziga mos ravishda harakat qildi. Misol uchun, yigit qo‘liga bolg‘acha olib, uni mikrofon sifatida tassavvur uyg‘otdi. Ularning kulguli harakatlari xonandaning qo‘shiq orqali aytmoqchi bo‘lgan tanqidiy munosabati yanada oydinlashtirdi.
Shu o‘rinda “Ilhom” teatr-studiyasining aktyor va aktrisasidan iborat juftlikning ishtiroki haqida. Bizningcha, qo‘shiqlarga bunday yondoshish, ya’ni, xonanda tomonidan kuylanayotgan taronalarga asosan improvizatsiya harakatlari “Istiqlol” san’at saroyida ilk marotaba qo‘llangan tajriba bo‘ldi.
Ularning chiqishlari “Gunohim”, “Qo‘shiqchi”, “Muhabbat oliyjanob yoxud Jin”, “Soat” kabi qo‘shiqlarga muayyan kayfiyat qo‘sha oldi. Xonandaning ular bilan bir necha marotaba raqsga tushib, ular kabi harakat qilishi muxlislar tomonidan yaxshi kutib olindi. Nazarimizda, tajriba o‘zini oqladi.
Dasturga nomi berilgan ajoyib “Kuz gullari” qo‘shig‘idan so‘ng, xonanda konsertga mehmon sifatida tashrif buyurgan O‘zbekiston xalq artisti Nasiba Abdullayevaga qarab: “Bu qo‘shig‘im sizning qo‘shig‘ingizga o‘xshab qolgani uchun uzr so‘rayman”, — dedi.
Dasturda kuylanishi rejalashtirilgan 16 qo‘shiq orasida “Bevafo”, “Ayol makri” kabilar yo‘q edi, ammo xonanda birdan bu qo‘shiqlarni ham kuylab ketdi. Dasturning shu joyida qo‘shiq aytishni to‘xtatib, sozandalarga qarata “Xato qilyapsizlar-ku!”, deya e’tiroz ham qilib qo‘ydi.
“Konsertimizda ba’zi muxlislarimizning talablariga binoan eski qo‘shiqlarni kuylaganimiz uchun sizlardan uzr so‘rayman”, — deya muxlislardan yana bir marta uzr so‘rab qo‘ydi. Bu xonandaning konsert davomida uchinchi bor uzr so‘rashi edi.
“Men o‘zimni sevaman, menga o‘zim yoqadi” deb nomlangan qo‘shiqni xonandaning qo‘l harakatiga mos ravishda goh o‘ng qanotdagilar, goh so‘l tomondagi muxlislar jo‘r bo‘lib kuyladi.
Jonli ijroda bo‘lib o‘tadigan dasturda xonandaga qanchalik qiyin bo‘lsa, sozandalarga ham shunchalar qiyin. Ayniqsa har bir narsada o‘ta injiq va talabchan bo‘lgan Jahongir Otajonovning sozandalariga bu borada yana bir karra qiyin. Dasturda sozandalarning munosib mehnati alohida e’tirof qilishga arziydi.
Xonanda o‘tgan safargi an’anasiga sodiq qolgan holda bu galgi konsert dasturini ham videoga oldirmadi. Bu uning o‘ziga xos strategiyasi ekanligini intervyuda ham aytib o‘tgan edi. Ammo juda ko‘plab muxlislar dasturni o‘zlarining qo‘l telefoniga muhrladi.
“Soat” deb nomlangan tarona ikki oydan ortiq tayyorgarlik ko‘rilgan, a’lo darajada va 100 foiz jonli ijroda o‘tgan dasturga yakun yasadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)