28—29 октябрь кунлари «Истиқлол» санъат саройида хонанда Жаҳонгир Отажоновнинг жонли ижродаги «Куз гуллари» номли концерт дастури бўлиб ўтди. Концертда журналист Феруз Муҳаммад бўлди ва ўз фикрлари билан ўртоқлашди.
Баъзи журналистларнинг «бир йилда бўлаётган иккинчи концертга мухлислар келармикан, бу нотўғри бўлса керак», дея билдирган хавотирлари ўринсиз бўлиб чиқди: «Истиқлол»нинг зали ҳам, балкони ҳам мухлислар билан лиқ тўлди. Улар Жаҳонгир Отажоновни саҳнага чиққунича, саҳнага чиққандан кейин ҳам давомли қарсаклар билан олқишлаб турди.
«Гуноҳим» деб номланган қўшиқ ярим соат кеч бошланган дастурнинг илк таронаси бўлди. «Мен сизга муштоқман, сиз менга муштоқсиз» деб номланган қўшиғини куйлаб, зал бўйлаб «саёҳатга» чиққан Жаҳонгир Отажонов залнинг у бурчагидан, то бу бурчагига қадар ҳам қўшиқ айтиб, ҳам рақсга яқин ҳаракатлар қилиб, ҳам мухлислар билан селфи тушиб саҳнага қайтди.
Саҳнага қайтган хонанда мухлисларга қарата: «Залнинг охирида ўтирган мухлислар билан ҳам кўришиб қайтмасам бўлмасди. Агар қайсидир мухлисимизга шўхлигим малол келган бўлса, тартибсизлигим учун узр сўрайман», дейиши билан, бунга жавобан мухлислар томонидан гулдурос қарсаклар ва: «Ундай эмас, ҳаммаси жойида», деган ҳайқириқлар эшитилди.
Дастурда тўртинчи бўлиб янграган «Истайсизми йўқми, сизни севаман» номли қўшиқдан сўнг, назаримда, томошабирнларга ҳам, хонандага ҳам «жон кирди». Хонанда бугунги кунда ўзини қўшиқчи сифатида эътироф қилаётган қўштирноқ ичидаги қўшиқчиларга «Қўшиқчи» қўшиғи орқали танқидий муносабат билдирди.
«Қўшиқчи» қўшиғига «Илҳом» театр-студиясининг актёр ва актрисасидан иборат жуфтлик томонидан ажойиб саҳна кўриниши тайёрланган. Улар қўшиқ сўзига мос равишда ҳаракат қилди. Мисол учун, йигит қўлига болғача олиб, уни микрофон сифатида тассаввур уйғотди. Уларнинг кулгули ҳаракатлари хонанданинг қўшиқ орқали айтмоқчи бўлган танқидий муносабати янада ойдинлаштирди.
Шу ўринда «Илҳом» театр-студиясининг актёр ва актрисасидан иборат жуфтликнинг иштироки ҳақида. Бизнингча, қўшиқларга бундай ёндошиш, яъни, хонанда томонидан куйланаётган тароналарга асосан импровизация ҳаракатлари «Истиқлол» санъат саройида илк маротаба қўлланган тажриба бўлди.
Уларнинг чиқишлари «Гуноҳим», «Қўшиқчи», «Муҳаббат олийжаноб ёхуд Жин», «Соат» каби қўшиқларга муайян кайфият қўша олди. Хонанданинг улар билан бир неча маротаба рақсга тушиб, улар каби ҳаракат қилиши мухлислар томонидан яхши кутиб олинди. Назаримизда, тажриба ўзини оқлади.
Дастурга номи берилган ажойиб «Куз гуллари» қўшиғидан сўнг, хонанда концертга меҳмон сифатида ташриф буюрган Ўзбекистон халқ артисти Насиба Абдуллаевага қараб: «Бу қўшиғим сизнинг қўшиғингизга ўхшаб қолгани учун узр сўрайман», — деди.
Дастурда куйланиши режалаштирилган 16 қўшиқ орасида «Бевафо», «Аёл макри» кабилар йўқ эди, аммо хонанда бирдан бу қўшиқларни ҳам куйлаб кетди. Дастурнинг шу жойида қўшиқ айтишни тўхтатиб, созандаларга қарата «Хато қиляпсизлар-ку!», дея эътироз ҳам қилиб қўйди.
«Концертимизда баъзи мухлисларимизнинг талабларига биноан эски қўшиқларни куйлаганимиз учун сизлардан узр сўрайман», — дея мухлислардан яна бир марта узр сўраб қўйди. Бу хонанданинг концерт давомида учинчи бор узр сўраши эди.
«Мен ўзимни севаман, менга ўзим ёқади» деб номланган қўшиқни хонанданинг қўл ҳаракатига мос равишда гоҳ ўнг қанотдагилар, гоҳ сўл томондаги мухлислар жўр бўлиб куйлади.
Жонли ижрода бўлиб ўтадиган дастурда хонандага қанчалик қийин бўлса, созандаларга ҳам шунчалар қийин. Айниқса ҳар бир нарсада ўта инжиқ ва талабчан бўлган Жаҳонгир Отажоновнинг созандаларига бу борада яна бир карра қийин. Дастурда созандаларнинг муносиб меҳнати алоҳида эътироф қилишга арзийди.
Хонанда ўтган сафарги анъанасига содиқ қолган ҳолда бу галги концерт дастурини ҳам видеога олдирмади. Бу унинг ўзига хос стратегияси эканлигини интервьюда ҳам айтиб ўтган эди. Аммо жуда кўплаб мухлислар дастурни ўзларининг қўл телефонига муҳрлади.
«Соат» деб номланган тарона икки ойдан ортиқ тайёргарлик кўрилган, аъло даражада ва 100 фоиз жонли ижрода ўтган дастурга якун ясади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)