Oldinda turgan O‘zbekiston Prezidenti saylovi xorijiy mamlakatlarning ekspert doiralari vakillarida ham katta qiziqish uyg‘otmoqda. “Jahon” agentligi Kuvayt nashrlarida jurnalistlar va ekspertlar bu borada bildirayotgan fikrlarni keltirdi.
Muhammad al-Xalidiy, Kuvaytda nashr etiladigan “Al-Anba” gazetasi muharriri:
“O‘zbekiston va Kuvayt do‘st mamlakatlar hamda mintaqadagi muhim sheriklar hisoblanadi. Biz O‘zbekistonda o‘tkaziladigan Prezident saylovlariga tayyorgarlikning borishini katta qiziqish bilan kuzatib bormoqdamiz. Chunki bu tadbir muhim siyosiy voqea hisoblangani holda ko‘p jihatdan mamlakatning bundan keyingi taraqqiyotini belgilab beradi. Oldinda turgan saylovlarda to‘rtta siyosiy partiyadan nomzodlarning ishtirok etishi mamlakatda saylovlar demokratiya tamoyillari asosida o‘tkazilishidan dalolat beradi. O‘zbekiston mintaqaning eng muhim mamlakatidir. Biz mustaqil rivojlanish yillari davomida respublikada ro‘y bergan demokratik o‘zgarishlar natijalarini hamda iqtisodiyot jabhasida qo‘lga kiritilgan keng ko‘lamli muvaffaqiyatlarni ijobiy baholaymiz. O‘n yildan ziyod davr mobaynida mamlakatda barqaror o‘sish kuzatilmoqda. Bugungi kunda O‘zbekiston dunyoning iqtisodiyoti eng tez rivojlanayotgan besh davlati qatoridan joy olgan. Bularning barchasi O‘zbekiston to‘g‘ri tanlagan demokratik va iqtisodiy taraqqiyot yo‘li o‘zini to‘la oqlagani hamda boshqa mamlakatlar uchun ijobiy namuna bo‘lganidan dalolat beradi. O‘zbekiston Respublikasi birinchi Prezidenti Islom Karimov qayd etganidek, iqtisodiy mustaqillikka erishmasdan siyosiy mustaqillikni ta’minlash mumkin emas. Ishonchim komilki, oldinda turgan O‘zbekiston Prezidenti saylovlari ko‘p sonli xorijlik kuzatuvchilar ishtirokida ochiqlik va shaffoflik muhitida o‘tadi. O‘zbekiston xalqi munosib nomzodni yoqlab ovoz berishiga ishonchim komil”.
Hamed Hafez al-Abdulla, Kuvayt universiteti Ijtimoiy fanlar fakulteti dekanining o‘rinbosari:
“Oliy o‘quv yurtining professori sifatida O‘zbekistonda ilm-fan, ta’lim, sog‘liqni saqlash, madaniyat, san’at va sport singari sohalarni rivojlantirishga qaratilayotgan e’tibor haqida so‘zlashni istar edim. 2014-yili O‘zbekistondagi parlament saylovlarida xalqaro kuzatuvchi sifatida ishtirok etgan chog‘imda xalqaro andozalar darajasida sifatli ta’lim olish uchun zarur barcha sharoitlar yaratilganiga guvoh bo‘lgan edim. Respublikada yaratilgan ta’lim va tarbiyaning yangicha tizimi muvaffaqiyat bilan hayotga tadbiq etilmoqda. O‘zbekiston — yosh, zamonaviy va shitob bilan rivojlanayotgan mamlakat. Respublika aholisining asosiy qismini yoshlar tashkil etadi. Bu esa mamlakat porloq kelajakka ega ekanligidan dalolat. Shu o‘rinda o‘zbek yoshlari yuqori darajada bilimga ega ekanliklarini va ular barcha sohalarda o‘z mamlakati salohiyatini mustahkamlashga munosib hissa qo‘shayotganini qayd etish zarur, deb o‘ylayman. O‘zbekiston sport ustalari joriy yilda Braziliyaning Rio-de-Janeyro shahrida bo‘lib o‘tgan XXXI yozgi Olimpiya o‘yinlarida erishgan muvaffaqiyatlar eng yuqori bahoga loyiqdir. Oldinda turgan O‘zbekiston Prezidenti saylovlari yuksak darajada, shaffoflik, ochiqlik va demokratiya tamoyillari asosida o‘tishiga shubha yo‘q”.
Izoh (0)